जनकपुरमा एउटै विद्यालयमा दुई पटक आगजनी

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधामस्थित एक नीजि विद्यालयमा दुई पटक आगजनी गरिदिएको छ ।

जनकपुरधाम उपमहानगरपालिका वडा नम्बर १ पुलचोकस्थित रहेको शिव शारदा सेकेन्ड्री इंग्लिश बोर्डिङ स्कुलमा अज्ञात समूहले पुनः आगजनी गरिदिएपछि कार्यालयको सबै कागजातहरु जलेर नष्ट भएको छ ।

शुक्रबार बिहान विद्यालयको कार्यालयको ताला तोडेर सम्पूर्ण सामानलाई एउटा सोफामा राखी आगजनी गरिएको अवस्थामा विद्यालयका सञ्चालक सुजित मिश्रले देखेका थिए ।

स्कुलको अफिसको ताला तोडेर कसैले आगजनी गराएको हुन सक्ने सञ्चालक मिश्रले बताए । उनले आफूहरू घरमा नरहेको अवस्थामा अज्ञात समूहले विद्यालयमा आगजनी गरेको जानकारी दिए । आगलागीबाट करिव १० लाख रुपैयाँको भौतिक क्षति भएको बताइएको छ ।

आगलागीबाट विद्यालयको तीनवटा दराज, दुई थान सोफा, विद्यालयका महत्वपूर्ण कागजपत्र, टेलिभिजन, दुई थान प्रिन्टर, प्रअ बस्ने कुर्सी, टेबल जलेको प्रहरीले जनाएको छ ।

विद्यालय प्रवेश गर्ने मुख्य गेट, अफिस छिर्ने गेट, अफिसको बाहिरबाट ताला लागेर बन्द रहेको अवस्थामा ताला फोडेर आगलागी गरिएको बताइएको छ ।

प्रधानाध्यापकको कोठामा भएको आगलागीबाट स्थापनाकालदेखिको स्कुलको सबै रेकर्ड जलेर खरानी भएको छ ।

विद्यालयका सञ्चालक मिश्रले शैक्षिक संस्थामा आगजनी गरेर लाखौं रुपैयाँको क्षति पुर्‍याउने दोषी पत्ता लगाएर कडा कारबाहीको माग गर्दै प्रहरीमा उजुरी दिएको बताए ।

सोही विद्यालयमा गत वर्षपनि एक व्यक्तिले आगजनी गरिदिएको थियो ।