कबिर सन्तलाई झोपडीमा देखेपछि कमला नगरपालिकाका मेयर गोईतले मन्दिर बनाउँदै

न्यूज ब्यूरो, जनकपुरधाम । पूर्वी धनुषाको कमला नगरपालिकाका मेयर राम उदगार गोईतले एक सन्तलाई झुपडीमा देखेपछि मन्दिर बनाईदिने भएको छ ।

कमला नगरपालिका वडा नम्बर ८ हरिने टोलस्थित कविर साधुहरुको सँख्या अधिक रहेको र एक साधुलाई झुपडीमा देखेपछि उनले मन्दिर बनाईदिने वाचा बमोजिम बुधबार शिलान्यास गरेका छन् ।

कमला नगरपालिकाका निमित्त प्रमुख प्रशासकीय अधिकृत वीरेन्द्र कुमार सढानको विशेष पहलमा छठ पर्वकै दिन कबिर मन्दिरको शिलान्यास गरिएको छ । यसैका साथ, कमला नगरपालिकामा आजैदेखि आर्थिक वर्ष २०७८÷०७९ को कार्यक्रम पनि सुरुवात भएको अधिकृत सढानले बताए ।

सो क्रममा बोल्दै मेयर गोईतले साधु सन्त धार्मिक धरोहर रहेको बताए । पवित्र कमला नदीको नाममै नगरपालिकाको नामाकरण गरिएको बताउँदै उनले अन्य वडाभन्दा वडा नम्बर ८ मा कविर साधुहरुको सँख्या पनि अधिक रहेको मध्यनजर गरी कुट्टि बनाउने निधो गरेको बताए ।

कवीर साधु सन्तहरुको लागि आस्था भएपनि मन्दिर नहुँदा उनीहरुमा अन्यौलता रहेको बेला मन्दिर बनाइदिने भएपछि साधुसन्तहरुले मेयर गोईतको प्रशँसा गरेका छन् । उनीहरुले धार्मिक आस्थालाई सम्मान गरेको भन्दै उनको प्रशँसा गर्दै आर्शिवाद थापेका थिए ।

कमला नगरपालिकाबाट ५ लाख रुपैयाँ बजेट बिनियोजन गरी सो मन्दिर आउँदो २ महिनाभित्रै निर्माण गरिने जनाइएको छ । मन्दिरका साथै त्यहाँ बस्ने कबिर साधुलाई वासको समेत व्यवस्था सोही ठाउँमा बनाउने भएको छ ।

बुधबार कमला नगरपालिकाका मेयर राम उदगार गोईत, प्रमुख प्रशासकीय अधिकृत वीरेन्द्र कुमार सढान, वडा नं ८ का वडाध्यक्ष राजेश्वर मरिकले सँयुक्त रुपमा शिलान्यास गरेका छन् ।

मन्दिर बनाउनको लागि यसअघि नै ९ सदस्यीय उपभोक्ता समिति गठन गरिसकेको बताउँदै अधिकृत सढानले दुई महिनामै मन्दिर तयारी हुने र त्यसपछि उदघाटन भई मूर्ति राखिने बताइएको छ ।

महान पर्व छठकै दिन यस वर्षको विकास निर्माणको पहिलो कार्य मन्दिर निर्माणबाटै गरिएको अधिकृत सढानले जनाए । शिलान्यास कार्यक्रममा दर्जनौ कविर साधुहरुको उपस्थिति रहेको थियो ।