जनकपुरः हेडमास्टरमाथि जनकारवाही भन्दै कालोमोसो

न्यूज ब्यूरो, जनकपुरधाम । धनुषामा एक विद्यालयका प्रधानाध्यपाक (हेडमास्टर) माथि जनकारवाही भन्दै कालोमोसो दलेका छन् ।

प्रदेश नम्बर २ कोअ स्थायी राजधानी जनकपुरधामदेखि केही दुरीमा रहेको धनुषाको बरकुर्बा माविका प्रधानाध्यापक बैजु साहलाई विद्यालयका विद्यार्थीहरु सहित स्थानीय युवाहरुले कालोमोसो दलेका छन् ।

शुक्रबार दिउँसो करिब १२ बजेको समयमा सबैला नगरपालिका वडा नं. १२ रघुनाथुर बरकुर्बास्थित रहेको फकिरचन्द उच्च माध्यमिक विद्यालयका प्रधानाध्यापक बैजु साहलाई विद्यार्थीहरु सहित युवाहरुले कालोमोसो दलेका छन् ।

विद्यालयका विद्यार्थीहरुले नियमित पठन पाठन हुनुपर्ने र शिक्षकको व्यवस्थापन हुनुपर्ने, विभिन्न शुल्कको नाममा लिएको रकमको बिल विद्यार्थीहरुले पाउनुपर्ने, कक्षा ११ र १२ का विद्यार्थीहरुले पुस्तक पाउनुपर्ने, विद्यालयको नाममा आएका समाग्रीहरु विद्यालयमै राख्नुपर्ने, विद्यालय सुधारको लागि सरोकारबालाहरुको वृहत भेला गरी अन्य विषयहरुमा निर्णय लिनुपर्ने लगायतका मागहरु राखेको थियो ।

यसको लागि जनमत पार्टी नगर कमिटिले समेत समर्थन जनाएको थियो । हेडमास्टर डरले विगत ५ दिनदेखि आफ्नै घरमा रहेर विद्यालय बन्द गरेका थिए ।

विद्यार्थीहरु उठाएको विभिन्न मागहरुलाई बेवास्ता गर्दै डरले हेडमास्टर साह विद्यालय गएका थिएनन् । विगत पाँच दिनदेखि विद्यालय नगएका प्रधानाध्यापक साह शुक्रबार दिउँसो सबैलास्थित भेटिएको थियो ।

विगत पाँचदिनदेखि प्रतीक्षा गरिरहेका विद्यार्थीहरुले विद्यालय र हेडमास्टरको घरदेखि करिब २ किलोमिटरको दुरीमा बाटोमा जाँदै गर्दा कालोमोसोको सिकार भएको बताइएको छ ।

हेडमास्टर साहलाई विद्यार्थीहरुले चप्पल लिएर कुटेका पनि हुन । विद्यार्थीहरुको मागलाई वेवास्ता गरी विद्यालयमा राजनीति गरेको भन्दै विद्यार्थीहरुले चप्पले पिटेका हुन् ।

विद्यार्थीहरुले विद्यालयको बेतिथिको बारेमा सबै सरोकारबाला निकायहरुसँग भनेपनि कुनै सुनुवाई नहुँदा बाध्य भएर हेडमास्टरलाई कालोमोसो दलेर जनकारवाही गरेको बताएको छ ।

अहिले विद्यालयमा सबैला नगरपालिकाका मेयर, प्रहरी प्रशासन समेत पुगेका छन् । यसबारे हेडमास्टर साहसँग प्रतिक्रिया लिन खोज्दा सम्पर्क भने हुन सकेनन् ।