प्रदेश २ मा मदरसालाई विद्यालय बराबर मान्यता दिनुपर्छः नेता यादव

न्यूज ब्यूरो, जनकपुरधाम । जनता समाजवादी पार्टी नेपाल(जसपा) का नेता जीतेन्द्र कुमार यादवले मदरसालाई पनि विद्यालय (स्कूल) बराबरको मान्यता हुनुपर्ने बताएका छन् ।

आईतबार धनुषाको सबैला नगरपालिका वडा नम्बर ४ जरहियामा आयोजित पार्टी प्रवेश कार्यक्रममा बोल्दै यादवले प्रदेश २ मा मुस्लिमहरुको मदरसालाई पनि विद्यालय बराबरको मान्यता दिनुपर्नेमा जोड दिए ।

सो कार्यक्रममा बोल्दै उनले मधेशी जनअधिकार फोरम देखि जनता समाजवादी पार्टी नेपाल पनि यस्तै परिवर्तनको लागि निरन्तर उठेको बताए ।

संघीय नेपालको सात वटै प्रदेशलाई औल्याउँदै नेता यादवले सबभन्दा उपेक्षित र सबभन्दा शोषित मुस्लिम समुदाय नै रहेको बेला प्रदेश नम्बर २ मा उनीहरुलाई माथि उकास्नको लागि शिक्षामा जोड दिनुपर्ने धारणा राखे ।

उनले मुस्लिम समुदायका बालबालिकाहरुले पढने मदरसालाई विद्यालय सरह मान्यता नपाएसम्म उनीहरुको स्तर उकास्नेमा शँका जाहेर गरे । उनले भने, –“सबभन्दा शोषित मुस्लिम समुदाय रहेको छ यो सातवटै प्रदेशमा, उनीहरुको शिक्षालाई अझै प्रगाढ बनाउन मदरसालाई पनि विद्यालय जस्तै मान्यता पाउनुपर्छ । यस्तो भएपनि उनीहरुको शिक्षा क्षेत्र मजबुत भएर उनीहरुको जीवनस्तर पनि उकास्ने छ ।”

‘जुन आज ७ ओटा प्रदेशमा जनता सामाजवादी पार्टी र मधेशको मशिहा जसपाका अध्यक्ष उपेन्द्र यादवको विचार थियो । देशमा सबभन्दा बढी शोषित समुदाय जुन छ त्यो मुस्लिम समुदाय हो र उनीहरुको हकअधिकारको लागि जसपा पार्टी आवाज उठाउँदै आएको छ ।

नेपाल बौद्धिक महासंघका केन्द्रिय उपाध्यक्ष समेत रहेका यादवले तत्कालिन मधेशी जनअधिकार फोरमको नेतृत्वमा वि.सं. २०६३ सालमा भएको मधेश आन्दोलन, ऐतिहासिक जनविद्रोहमा पनि मुस्लिम समुदायको लागि चर्को आवाज उठाउने पार्टी रहेको दाबी गरे ।

“यस देशमा मुस्लिमहरुको आ–आफ्नो अधिकार हुनुपर्छ ,जुन तरिकावाट वन्चित भएको थियो, यहाँ मदरसाको मान्यता स्कूल बरावर हुनुपर्यो ।” उनले भने ।

प्रदेश नम्बर २ मा जनता समाजवादी पार्टीकै बलमा मुख्यमन्त्री राउतले मदरसा विद्येयक ल्याएपछि विभिन्न टिकाटिप्पणी भइरहेको बताउँदै उनले अब मदरसालाई विद्यालय बराबरको मान्यता पाएलगत्तै मुस्लिम समुदायको बालबालिकाहरुले शिक्षामा फडको हान्ने बताए ।

पार्टीको निर्णय तथा पार्टीको विचारलाई मध्यनजर गरी प्रदेशमा ल्याएको मदरसा विद्येयकपछि मुख्यन्त्री राउतलाई तथानाम गरी विरोध जनाएकोप्रति आपत्ति जनाए ।