'भ्रष्टाचारी सँरक्षण गर्ने पार्टी मधेश छोड' भन्दै जनमतले मधेशमा बाले आगो

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीले मधेशमा आगो बालेका छन् । शनिबार मधेशको विभिन्न जिल्लामा टायर बालेर प्रदर्शन गरेका छन् ।

प्रहरीले पक्राउ गरेका जनमत पार्टीका नेता कार्यकर्ताको रिहाईको माग गर्दै शनिबार साँझ तराई मधेशको विभिन्न जिल्लामा टायर बालेर प्रशासन विरुद्ध प्रदर्शन गरेको हो ।

जनकपुरमा संघीय खानेपानी तथा ढल निकास आयोजना कार्यालयका प्रमुख जागेश्वर कुशवाहालाई जनकारबाही गरेको भन्दै सोही आरोपमा जनमत पार्टीका १७ कार्यकर्तालाई पक्राउ गरी प्रहरीले मुद्दा चलाएपछि जनमत पार्टीले आगो बालेको हो ।

धनुषा, महोत्तरी, सिरहा, सप्तरी, कपिलवस्तु, रुपन्देही लगायतका जिल्लाहरुको विभिन्न स्थानीय तहमा प्रशासन विरुद्ध नारावाजी गरिएको जनाइएको छ ।

यसका साथै, धनुषा, महोत्तरी, सिरहा र सप्तरीमा निकालिएको मशाल जुलुसमा प्रदेश नम्बर २ का मुख्यमन्त्री मो. लालबाबु राउत गद्दीलाई लक्षित गर्दै “साईकल चोर, मधेश छोड” भन्दै चर्को नारावाजी गरेको हो ।

जनमत पार्टीका कार्यकर्ताहरुले भ्रष्टाचारी सँरक्षण गर्ने पार्टी मधेश छोड, मूर्दावाद लगायतका नाराहरु घन्काएका हुन् । उनीहरुले “जनमतका नेता कार्यकर्ता निःशर्त रिहा गर, भ्रष्टाचारीलाई कारवाही गर, सिके राउत जिन्दावाद, जनमत पार्टी जिन्दावाद” को नारा लगाउँदै आगो बालेका हुन् ।

धनुषाको कमला नगरपालिकामा निकालेको मशाल जुलुशमा सो पार्टीका सयौं कार्यकर्ता सहभागी थिए । यस्तै, सिरहामा निकालिएको मशाल जुलुसमा मोटो सँख्यामा नेता कार्यकर्ताहरुले टायर बालेर प्रदर्शन गरेका हुन् ।

भ्रष्टाचारको आरोपमा बुधवार कार्यालय प्रमुख कुशवाहालाई आक्रोशित जनताले जनकारबाही स्वरुप हिलो दलेर बजार घुमाएका थिए ।

पक्राउ परेका नेता कार्यकर्ताहरुलाई बिना शर्त रिहा नगरे जनमत पार्टीले विशाल आन्दोलन गर्ने चेतावनी दिएको छ ।