जनकपुरः मोटरसाईकल दुर्घटना हुँदा दुई युवकको घटनास्थलमै मृत्यू, एक गम्भिर

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधामदेखि केही दुरीमा रहेको धनुषाको बीरेन्द्रबजारमा मोटरसाईकल दुर्घटना हुँदा दुई युवकको घटनास्थलमै मृत्यू भएको छ ।

धनुषाको गणेशमान चारनाथ नगरपालिकाको बीरेन्द्रबजार–महिनाथपुर सडकखण्ड अन्तर्गत भरतपुरस्थित बा ४८ प ५५२२ नम्बरको मोटरसाईकलमा सवार तीन जनामध्ये दुई जनाको घटनास्थलमै मृत्यू भएको छ भने एक जनाको अवस्था गम्भिर भएको छ ।

मृत्यू हुनेमा गणेशमान चारनानथ नगरपालिका वडा नम्बर १ बस्ने जोगिन्द्र महराको २७ बर्षिय छोरा दिपलाल महरा र सोही स्थान बस्ने बेनी पासवानको छोरा हरिचन पासवानको मृत्यू भएको हो । सोही दुर्घटनामा परी लालबाबु पासवानको अवस्था गम्भिर भएको छ ।

शनिबार बिहान करिब ९ बजेको समयमा बीरेन्द्रबजारबाट भरतपुरतर्फ तीव्र गतिमा चलाएको तीन जना सवार मोटरसाईकल रुखमा ठोकिएको प्रहरीले जनाएको छ । सडकभन्दा तल रहेको रुखमा ठोकिएर दुर्घटना भएको हो ।

मोटरसाईकलमा सवार तीन जनामध्ये एक जनाले पनि हेल्मेट लगाएका थिएनन् । हेल्मेट नलगाएको कारण उनीहरुको ज्यान तत्कालै गएको अनुमान गरिएको छ । घटनास्थलमा प्रहरी पुग्दा दुवै जनाको मुखबाट रगत आएको बताइएको छ ।

समयमै घटनास्थल पुगेको प्रहरीले एम्बुलेन्समा तीनै जनालाई उपचारको लागि जनकपुर पठाएको थियो । जनकपुर प्रादेशिक अस्पतालमा लैजाँदा चिकित्सकले अघि नै मृत्यू भईसकेको घोषित गरेको थियो ।
लालबाबुको उपचार अहिले भइरहेको छ ।