जनकपुरः ममता कामत आत्महत्या प्रकरणमा नयाँ मोड, कसैले जिस्काएका थिएनन् ?

न्यूज ब्यूरो, जनकपुरधाम । ट्युसन पढेर घर आउँदै गरेकी किशोरीलाई तीन युवकले जिस्काउँदा आत्महत्या गरेको घटनामा नयाँ मोड आएको छ ।

धनुषाको जनकनन्दनी गाउँपालिका वडा नम्बर ४ का सुरेश कामतकी १२ वर्षीया छोरी ममता कामतले विष सेवन गरी आत्महत्या गरेको घटनाले नयाँ मोड लिएको हो ।

गत भदौं २३ मा ट्यूसन पढेर फर्किने क्रममा तीनजना केटाले जिस्काएको र जिस्काउने ती केटाहरुलाई प्रहरीले कारबाही नगरी उल्टै बयानका लागि बोलाउन खोज्दा विष सेवन गरेकी उनको आफ्न्तले दावी गरेको थियो ।

जिस्काउने क्रममा केटाहरुले कागजमा लेखेर ममतालाई जर्वजस्ती मोवाइल नम्बर दिएको उनका बुवा सुरेशले प्रहरीलाई दिएको उजुरीमा उल्लेख छ । तर विष सेवन गरेर आत्महत्या गरेकी ममता र आरोपी संजय दासबीच विगत ६ महिनादेखि फोन सम्पर्क रहेको रहस्य बाहिरिएको छ ।

आरोपीका आफ्न्तले जनकपुरमा शनिवार पत्रकार सम्मेलन गरी ममता र संजयबीच फोनमा भएको कुराकानीको अडियो समेत सार्वजनिक गरेको छ । उनीहरुबीच भएको कुराकानीको अडियो सुन्दा कलिलै उमेरमा ममताले संजयसँग प्रेममा परेको थिइन् भन्ने स्पष्ट हुन्छ ।

ममताका आफ्न्तले भने अनुसार संजय र उनीसँग अन्य दुई केटा रहेका बेला बाटो छेकेर ममतालाई जर्वजस्ती नम्बर दिएका थिए । उक्त नम्बर लेखिएको कागज ममताले मामा नातामा पर्ने बलिरामलाई दिए ।

बलिरामले उक्त नम्बरमा फोन गरेपछि संजयले रिसिभ गरे र फोनमा विवाद चर्कियो । त्यसपछि संजय घरमै आएर बलिरामलाई कुटपिट गरे । तर संजय र ममताबीचको अडियो सम्बाद सुन्दा कागजमा लेखेर जर्वजस्ती नम्बर दिएको र कुरा नगरेको बेइज्जत गरिदिने दावी समेत गलत साबित भएको छ ।

आरोपीका आफ्न्तले बताए अनुसार ममता र संजयबीच कुरा भइरहेको थियो, त्यतिबेला उनका मामाले थाहा पाए । त्यसपछि उनका मामाले फोन गर्दा संजयसँग विवाद भयो ।

स्थानीय कौशिलादेवी दास भन्छिन्, ‘संजय र ममता आपसमा लभ गर्थिन् । उनी संजय बाटो छेकेर किन जिस्काउँछन् ? जिस्काएको आरोप निराधार हो । उनका अनुसार ममतालाई घरमै आफ्न्तले कुटपिट गरेको र त्यहीकारण उनी विष खाएर आत्महत्या गरिन् ।यो विषयमा प्रहरीले छानविन गरोस् ।

ममताको गत बुधवार मृत्यू भएपछि आरोपीमध्येका भिलबा दासलाई प्रहरीले पक्राउ गरी अनुसन्धान अगाडी बढाएको छ । घटनामा संलग्न भनिएका संजय र कलेश्वर फरार छन् । संजयका काका भोगी दास भन्छन्, ‘ पञ्चातमा बोलाएर वडाध्यक्षले कुटपिट गर्न लगाए । अनी उल्टै अहिले फसाउन खोजिएको छ ।

घटनाको सुक्ष्म रुपमा छानविन गर्न प्रहरीसँग मेरो अनुरोध छ ।’ प्रहरीले निष्पक्ष तरिकाले अनुसन्धान गर्दा आरोपीहरु निर्दोष सावित हुने दलितका अगुवा रामउदगार दासको दावी छ ।

यता, जाहेरी दर्ता नगरिदिएको आरोप लागेको ईलाका प्रहरी कार्यालय खजुरीले समेत बयानको लागि बारम्बार बालिकालाई लिएर आउन भनेपनि नआएपछि शँका लागेको बताएको छ ।

ईलाका प्रहरी कार्यालय खजुरीका प्रहरी नीरिक्षक रबिनराज मैनालीले मृतक बालिकाको बुवाले दिएको जाहेरीमाथि अनुसन्धानको लागि बालिकाको बयान आवश्यक रहेको बताउँदै बालिकालाई पटक पटक ल्याउन भनेपनि उनको बुवाले नल्याएको बताएका छन् ।

उनले भने,–“हामी पटक पटक नै ममताको बुवालाई ममतलाई लिएर आउन भन्यौ, तर उनीहरुले ममतालाई ल्याएनन, अनि हाम्रो शँका बढयो । बिना बयानको आधारमा जाहेरी दर्ता कसरी गर्न मिल्ने ? ममतासँग केही सोधपुछ गर्नुछ भनेर उनका बुवा सुरेश कामतलाई पटक पटक भनेको थिए, तर ल्याएनन् ।”

जिस्काएको एक महिनापछि आत्महत्या गर्नु भनेको पनि शँकास्पद रहेको बताउँदै ईन्सपेक्टर मैनालीले एक जनालाई नियन्त्रणमा लिएर अनुसन्धान अगाडी बढाएको बताए ।

यता, सँजयसँग ममताको प्रेम सम्बन्ध रहेको र निरन्तर फोनमा कुरा भएको बुझदा परिवारजनकै यातनाले बिष खाएको हुनुपर्ने आरोप समेत लगाइएको छ । परिवारजनको यातनापछि किशोरी (ममता) ले आत्महत्या गरेको हुन सक्ने बुझिएको छ ।