धनुषाका शिक्षा अधिकारी र एक शिक्षकबीच कार्यालयमै चर्काचर्की

न्यूज ब्यूरो, जनकपुरधाम । धनुषाका जिल्ला शिक्षा समन्वय ईकाईका कार्यालय प्रमुख र एक पूर्व प्रधानाध्यापकबीच मँगलबार चर्काचर्की भएको छ ।

जनकपुरधामस्थित रहेको जिल्ला शिक्षा समन्वय ईकाईका कार्यालय प्रमुख (शिक्षा अधिकारी) ईश्वर ज्ञवाली र धनुषाकै एक पूर्व प्रधानाध्यापक (हेडमास्टर) बेचन प्रसाद यादवबीच मँगलबार दिउँसो विवाद भएपछि हातपात समेत भएको छ ।

धनुषाको शहिदनगर नगरपालिका वडा नम्बर २ मावि मतौनाका पूर्व प्रधानाध्यापक यादवले राहत शिक्षकको समस्यालाई लिएर जिल्ला शिक्षा समन्वय ईकाई कार्यालय पुगेका थिए । सो क्रममा कार्यालय प्रमुखले मदत नगरेको भन्दै विवाद भएको थियो ।

यादवले कार्यालय प्रमुख ज्ञवालीलाई बारम्बार “तपाईले ठग्नुभयो” भन्ने शब्द दोहरयाएपछि ज्ञवाली आक्रोसित बनेका थिए । पूर्व प्रअ यादव स्थानीय भाषा (ठेठ मैथिली) मा कार्यालय बोलाएर समस्या हल नगरिदिएको भनेर ठग्नुभयो भनेपछि ज्ञवाली आक्रोसित बनेका थिए ।

कार्यालय प्रमुख ज्ञवालीले नेपाली भाषामा ठग्नुभयो को अर्थ केही कुरा लिएर नदिएको वा कसैलाई ठगी गरेको भनेर बुझिन्छ तर, पूर्व प्रअ यादवसँग मेरो त्यस्तो केही लेनदेन, कुराकानी समेत नभएको अवस्थामा बारम्बार “ठग्नुभयो” शब्द दोहरयाएपछि आफू आक्रोसित बनेको बताए ।

न्यूज ब्यूरोसँगको सँक्षिप्त कुराकानीमा शिक्षा अधिकारी ज्ञवालीले राहत शिक्षकको सरुवालाई लिएर यादव डेलिगेशन लिएर आएको बताउँदै सो विद्यालयमा नगरपालिकाले राहत शिक्षकलाई हटाएर स्थायी शिक्षक राखेपछि राहतमै आफ्नो छोरालाई हेडमास्टर राख्नको लागि डेलिगेशन लिएर आएको बताए ।

७५ बर्षिय पूर्व प्रअ यादवले सो विद्यालयका केही कर्मचारी सहित आफ्नो छोरालाई समेत लिएर गएको बताइएको छ । उनले बारम्बार अधिकारीलाई ठगेको शब्द भनेपछि ज्ञवाली आक्रोसित बनेको र पछि स्टाफहरुले ठेठ मैथिलीमा ठग्नुको समान्य अर्थ लागेको बताएपछि भाषामा अलमल भएको स्वीकारे ।

यता, पूर्व प्रअ यादवले भने आफू हातपात नगरेको तथा झडपको अवस्था सृजना भएको स्वीकारे । उनले आफू हल्का हात मात्र लगाएको स्वीकारे । अधिकारीले आफूहरुलाई बोलाएर सहयोग नगरेको भन्दै आफू आक्रोसित बनेको बताए ।

समाजिक सँजालमा शिक्षा अधिकारीलाई हातपात गरेको तथ्य झुठो र अफवाह मात्र रहेको अधिकारी ज्ञवालीले बताए । पूर्व प्रअ यादवले समेत हातपात नभएको बताए ।