जनकपुरः दलितको लागि ७० वटा घर बनाउँदै मधेश सरकार, मन्त्री यादवले गरे शिलान्यास

न्यूज ब्यूरो, जनकपुरधाम । मधेश सरकारले गरिब दलितको ७० वटा घर बनाउने भएको छ । सोही क्रममा प्रदेश नम्बर २ का भौतिक पूर्वाधार विकास मन्त्री राम सरोज यादवले घरको शिलान्यास गरेका छन् ।

प्रदेश सरकारको जनता आवास कार्यक्रम अन्तर्गत धनुषा जिल्लाको नगराइन नगरपालिका वडा नम्बर २ स्थित योजना अनुरुप ७० दलित परिवारको घर बनाउन सोमबार शिलान्यास गरेका हुन् ।

सो ठाउँमा रहेका विपन्न तथा दलित परिवारको लागि मधेश सरकारको जनता आवास कार्यक्रम अन्तर्गत ७० वटा घर बनाउन लागिएको जनाइएको छ । उनीहरुको घर परिवारको अवस्था दयनीय र रहनसहनको समेत कठिनाई भएको अवस्थामा जनता आवास कार्यक्रम लागू गर्न लागिएको बताइएको छ ।

शिलान्यास समारोहमा प्रदेश साँसद शिवचन्द्र चौधरी, मन्त्री यादवका सल्लाहकार जीवनाथ चौधरी लगायतको उपस्थिति रहेको थियो ।

प्रदेश सरकारले आर्थिक, सामाजिक र शैक्षिक रूपमा पछाडि परेका डोम, मुसहर, चमार र हलखोर गरी चार जातका घर निर्माण प्रक्रिया अगाडि बढाएको छ ।