सौर्य सिमेन्टको बोरामा ठगी, ५० किलो भनेपनी तौलमा कमी (भिडियो सहित)

न्यूज ब्यूरो, जनकपुरधाम । नेपालभरिमा उत्पादन हुने सिमेन्टमा प्रायः ५० किलो वजन लेखिएको हुन्छ । तर, उपभोक्ताले सो बोराको तौल नगर्दा ठगीमा समेत पर्ने गरेको देखिएको छ ।

सोही क्रममा प्रदेश नम्बर २ को सिरहा जिल्लास्थित रहेको सौर्य सिमेन्टको बोरामा तौल कम रहेको पाइएको छ । गोदामबाट नापतौल गर्ने क्रममा सौर्य सिमेन्टको बोरा तौल गर्दा ५ देखि ७ किलोसम्मको तौलमा कमि रहेको देखिएको छ ।

उदयपुरको चुनढुँगाबाट तयार पारिएको भनेर व्यापक प्रचार प्रसार गरिएको सौर्य सिमेन्टको बोरा तौल गर्दा तौल कम रहेको पाइएको छ । ४३ ग्रेडको ओपिसी सिमेन्ट उत्पादनकर्ता सौर्य सिमेन्ट इन्डस्ट्रीज प्रा.लि. सिरहा मिर्चैयाबाट प्याकिँग भएको सिमेन्टको तौल कम पाइएको छ ।

उपभोक्ताहरुले ५० किलोको सिमेन्ट भएर आँखा चिम्लेर विश्वास गरेपनि तौल गर्दा तौल कम भएको देखिएको छ । सर्लाहीको लालबन्दी र वीरगँजबाट समेत विक्री वितरण हुँदै आएको सौर्य सिमेन्टको बोरा तौल गर्दा कुनैमा ४३ किलो, कुनैमा ४५ किलो त कुनैमा ४८ वा ४९ किलो मात्र तौल पाईएको हो ।

कम्पनीले प्याकीँग गर्ने बेलामा ५० किलो रहेको भनेर दाबी गरी सिमेन्टको बोरामा प्रष्ट लेखेको हुन्छ । ७ सय १० देखि ७ सय १५ रुपैयाँसम्म प्रतिबोरा विक्री वितरण हुने सिमेन्टमा तौलको कमी हुँदा उपभोक्तामा अविश्वास कायम भएको छ ।

सिरहास्थित एक डिलरबाट गोदामा तौल गर्दा सिमेन्टको तौल कम पाइएको हो । सिमेन्टको बोरामा कम तौल भएको बारेमा बुझन् खोज्दा सिमेन्ट फ्याक्ट्रीले सार्वजनिक गरेको मोबाईल नम्बर ९८०१५७२११२ मा सम्पर्क हुन सकेनन् ।

यता, नापतौल गर्ने डिजिटल तराजुमा छेडखानी गरी भ्रमित गर्न खोजेको दाबी सौर्य सिमेन्टको छ । सौर्य सिमेन्टको सर्पोटका अनुसार, तराजुलाई योजनाबद्ध तबरले मिलाएर भिडियो खिचिएको दाबी गरिएको छ ।

डिजिटल तराजुमा उपभोक्ता ठगी पनि हुँदै आएको कैयाँै ठाउँमा देखिएको छ । सोही अनुसार, सौर्य सिमेन्टको बोरा नापतौल गर्ने समयमा तराजुलाई कृतिम हिसाबले मिलाएको हुनुपर्ने अनुमान गरिएको छ ।

सोही क्रममा जिल्ला प्रशासन कार्यालय सिरहाका प्रमुख जिल्ला अधिकारी प्रदीपराज कणेलले सिमेन्टको तौल कम भएको भनेर गुनासो तथा निवेदन आएको बताए । उनका अनुसार, तौल कम भएको र सोको जाँचबुझ गरी कारवाहीको लागि निवेदन परेको हो ।

उनले स्थानीय सरकार, सम्बन्धित निकायलाई सौर्य सिमेन्टको बोरा नापतौल गरी रिपोर्ट पठाउन निर्देशन दिएको बताए । अहिलेसम्म अपडेट भने नगरिएको उनले सुनाए ।