४१ जनालाई प्रहरीमा लगाएको भन्दै गृहमन्त्रीलाई धन्यवाद दिने काँग्रेसका कार्यकर्ता पक्राउ

न्यूज ब्यूरो, काठमान्डौँ । नेपाल प्रहरीमा आफू नै जागिर लगाउन पहल गरेको भन्दै फेसबुकमा स्टेटस लेख्ने नेपाली काँग्रेसका एक कार्यकर्ता पक्राउ परेका छन् ।

नेपाली कांग्रेसका प्युठानका जिल्ला उपसभापति बद्री लम्सालको सिफारिसमा जिल्लाका ४१ जनाको नाम नेपाल प्रहरीमा निस्किएको भन्दै गृहमन्त्रीलाई धन्यवाद दिएर स्टाटस लेख्ने कांग्रेस कार्यकर्ता पक्राउ परेका छन् ।

फेसबुक वालमा जिल्ला उपसभापति लम्सालको नामको सिफारिस र प्रहरीमा नाम निस्केकाहरुको नामसहित सार्वजनिक गर्ने नरेन्द्र गुरुङलाई प्युठान प्रहरीले शनिबार जुम्रीबाट पक्राउ गरेको हो ।

पक्राउ परेका नरेन्द्र गुरुङ प्युठानकै ऐरावती गाउँपालिकाका गुरुङले लम्साललाई बदनाम गराउन गलत प्रचार गरेको क्षेत्रीय सभापतिसमेत रहेका कांग्रेस नेता रोज राणाले बताए ।

यसैबीच कांग्रेसका जिल्ला उपसभापति बद्री लम्सालले विज्ञप्ति जारी गर्दै आफूलाई बदनाम गराएर महाधिवेशनमा पराजित गर्ने नियतले भ्रामक प्रचार गरिएको बताएका छन् ।

उनकै आग्रह र उजुरीअनुसार सामाजिक सँजाल फेसबुकबाट भ्रामक प्रचार गरेको भन्दै गुरुङलाई प्रहरीले पक्राउ गरेको हो । उनले आफ्नो स्टेटसमा प्यूठानबाट प्रहरीको लागि नाम निकालेकाहरुको नाम सादा कागजमा हातले लेखेर समेत पोष्ट गरेका छन् ।

उनले आफू नै गृहमन्त्रीलाई सोर्स लगाएर युवकहरुलाई प्रहरीमा नाम निकाल्न सहयोग गरेको उल्लेख गरेका छन् ।