मधेसीया नेताहरुले जनकपुरको आन्दोलन र शहिदलाई भुले, युवाहरु बिर्सेनन्

न्यूज ब्यूरो, जनकपुरधाम । जनकपुरमा गत २०७२ साल भदौ २५ गते प्रहरीको गोली लागेर शहिद भएका निकु यादव, दिलीप यादव र सँजय चौधरीलाई मधेसीया नेताहरुले पूर्ण रुपमा भुलेका छन् ।

मधेश आन्दोलनको क्रममा जनकपुरको मिल्स एरियास्थित सशस्त्र प्रहरीले नियन्त्रणमा लिएर तीनै जनालाई गोली हानेको थियो । दोस्रो मधेश आन्दोलनको क्रममा तीनै जनाले शहादत दिएका थिए ।

आफूलाई मधेशवादी दल भनाउने उपेन्द्र यादव नेतृत्वको जनता समाजवादी पार्टी, महन्थ ठाकुर नेतृत्वको लोकतान्त्रिक समाजवादी पार्टी लगायतले तीनै शहिदको स्मरण समेत गरेका छैनन् ।

यता, युवाहरुको लासमाथि, शहिदको लासको सिढी बनाएर सत्ता चढेको मधेसिया नेताहरुले स्मरण समेत गर्न नसक्नु लज्जास्पद रहेको मधेश अधिकार सँघर्ष समितिका सँयोजक सरोज मिश्रले बताएका छन् ।

शुक्रबार जनकपुरमा मिश्रको अगुवाई जनकपुरको रामानन्द चोकस्थित दिलीप यादव, निकु यादव र सँजय चौधरीको शहादत दिवसमा श्रद्धाञ्जली सभा एवम् दीप प्रज्वलन कार्यक्रम गरेका हुन् ।

२०७२ साल भदौ २५ गते आजैका दिन तत्कालिन मधेशी जनअधिकार फोरमले डाकेको चलु “जनकपुर, भरु जनकपुर” आन्दोलनको क्रममा उनीहरुले जनकपुरको मिल्स एरियास्थित निषेधाज्ञा पार गर्न खोज्दा गोली खाएका थिए ।

उक्त कार्यक्रममा मधेस जन बिद्रोह २०६३ का संयोजक दीपक झा, लोसपाका नेता एवं हिंदी अभियानी रमण पाण्डे, विद्यार्थी नेता शम्भू निर्दोषी , हिंदुत्व संस्था का मिथिलेश झा, युवा अभियन्ता प्रभाष राय, नेपाल जनता दलका केंद्रीय उपाध्यक्ष , युवा राजू कान्त कापड़ , उज्वल अग्रवाल लगायतका युवाहरु सहभागी थिए।

आफुलाई कथित मधेसबादी भन्न रुचाउने नेता ज्युहरु विलासिता र भ्रष्टाचार मा लिप्त भएकै कारण र मधेस एवं मधेस मुद्दा लाई सत्ता चढ़ने भरयाँग (सिढी) को रुपमा मात्र प्रयोग गरेको आरोप वक्ताहरुको थियो ।

“आजको दिन कुनै नेताहरु लाई स्मरण नहुनु तिनका असली चेहरा र स्वार्थ प्रष्ट हुनु हो मेरो ठंम्याई छ। युवाहरु लाई र मधेसी जनतालाई जागरूक हुनु आवश्यक।” मिश्रले भने ।