जनकपुरः छोरी बिहेको लागि किनेको सबै समान जलेर ध्वस्त

न्यूज ब्यूरो, जनकपुरधाम । जनकपुरमा छोरी बिहेको लागि किनेर घरमा राखिएको सबै समानहरु जलेर ध्वस्त भएको छ ।

जनकपुरधाम उपमहानगरपालिका वडा नम्बर ९ सरस्वती टोलमा मंगलवार राति भएको आगलगीमा लाखौंको क्षति भएको छ ।

स्थानीय कामनीदेवी ठाकुरको घरमा विद्युत सर्ट भएर आगो लाग्यो । आगो लाग्ने वित्तिकै स्थानीयले प्रहरी र जनकपुरधाम उपमहानगरमा बारुण यन्त्रका लागि फोन गरेका थिए । तर बारुण यन्त्र नपुग्दा ठूलो क्षति भएको छ ।

आगलगीबाट करिब १० लाख बढीको क्षति भएको पीडित परिवारको भनाई छ । पीडित कामनीदेवीले भनिन्, ‘छोरीको बिहे गर्न खरिद गरेको समान पनि सबै जलेर नष्ट भयो ।’ सुनचाँदी पनि जलेर नष्ट भएको उनको भनाई छ ।

जनकपुरमा पटक पटक आगलगीका घटनामा समयमा बारुण यन्त्र नपुग्दा ठूलो क्षति हुने गरेको छ । तर यसतर्फ उपमहानगरपालिका ध्यान नदिएको नगरबासीको आरोप छ ।