धनुषाका दुखि मण्डल ५ बर्षदेखि सउदी अरबबाटै सम्पर्कविहिन, परिवार अझै प्रतीक्षामा

न्यूज ब्यूरो, जनकपुरधाम । बैदेशिक रोजगारीमा गएका धनुषा एक व्यक्ति विगत ५ बर्षदेखि परिवारसँग सम्पर्कविहिन भएका छन् ।

धनुषाको कमला नगरपालिका वडा ७ सिंग्याही मडान बस्ने दुखि मण्डल विगत ५ बर्षदेखि परिवारजनबाट सम्पर्कबिहिन भएपछि परिवारजन चिन्तामा छन् ।

दुखि मण्डल सम्पर्कविहिन भएपछि यतिबेला उनको परिवारजनमा चिन्ताले सताएको छ । करिब ८ बर्षअघि नै विदेशिएका दुखि एकाएक सम्पर्क विहिन भएको उनकी श्रीमति विनिता देवी मण्डल बताउँछिन् ।

अब विस्तारै दुःखको दिन जान्छ र सुखको दिन आउँछ भनेर सोचेकी बिनिता देवीले दुखि मण्डलको सम्पर्कबिहिनपछि राम्ररी खान पाएकी छैनन् । दुखिको चिन्ताले उनलाई सताएको छ ।

ऋण तिर्ने, दुई सन्तानलाई राम्रो शिक्षा दिने, एउटा घर बनाउने, सहज जीवन बिताउने सोचेरै बिनिताले आफ्ना पति दुखी मण्डललाई सउदी अरब विदा गरेकी थिइन।

२ लाख रुपैयाँ कर्जा लिएर बिदेश गएका दुखि केही दिनपछि घरमा पैसा पठाउन थालेका थिए । कहिले १० हजार त कहिले २० हजार गरी निरन्तर पैसा पठाउन थालेका दुखि एकाएक सम्पर्कविहिन भएको बताइएको छ ।

विदेश गएको करिब २ बर्षपछि नै दुखि सम्पर्कविहिन भएको उनका कान्छो छोरा कृष्णा मण्डलले बताए । बुवा सम्पर्कविहिन भएपछि प्रायः प्रत्येक दिन उनको घरमा दुखिको चिन्ताले खाना समेत सुखचयनले खान पाएका छैनन् ।

दुखि बिदेश जाँदा उनको जेठा छोरा अमरेश मण्डल १३ बर्षका थिए भने उनका कान्छो छोरा कृष्णा मण्डल ९ बर्षका थिए । उनीहरुलाई कसरी पढाउने, कसरी पालनपोषण गर्ने भन्ने चिन्ताले विदेशिएका दुखि अहिलेसम्म फर्केर पनि आएका छैनन भने ५ बर्षदेखि नै परिवारसँग कुरा गरेका छैनन् ।

(उनी सिरहाका मुलबासी भएपनि धनुषाको सिँग्याही आएर बसेका हुन)

---

दुखि मण्डल विदेश गएको करिब अढाई बर्षपछि उनकी श्रीमति बिनिता देवीलाई उनलाई घर आउनको लागि फोनमै भनेकी स्मरण गरिन् । दुखिसँग मोबाईल नहुँदा उनैसँग बस्ने कपिलले उनलाई आफ्नो मोबाईलबाट कुरा गराइदिन्थे ।

विनिता देवीले थाहा पाएसम्म दुखी उँट र बाख्राको रेखदेख गर्ने कामका निम्ति कतार गएका थिए । दुखीसँग मोवाइल फोन नभएकाले उनलाई मालिक कपिलले नै सम्पर्क गराउँथे । अहिले त कपिल पनि सम्पर्कविहिन भएको बताइएको छ ।

‘पाँच बर्षअघि कपिलकै मोवाइलमा बोल्दा अब घर आउनुस् भनेकी थिएँ’, उनी भन्छिन्, ‘त्यसपछि एक दिन कपिलले फोन गरेर दुखी मण्डल नेपाल गइसकेको बताएका थिए ।’

तर, एक महिनासम्म पनि पति घर नआउँदा कपिलको नम्बरमा पटक–पटक फोन गरेको तर, सम्पर्क नभएको विनिता बताउँछिन् । दुखी अझै परिवारको सम्पर्कमा आएका छैनन् ।

दुखिकी श्रीमति बिनिता देवी

---

सउदी अरेबियास्थित वैदेशिक रोजगारीमा गएका दुखि त्यहाँस्थित अनोहोरा नामक कम्पनीमा गएको उनका कान्छो छोरा कृष्णले बताए । उनले पनि जानकारी पाएसम्म त्यहाँस्थित रहेको अनोहोरा कम्पनीमा काम गर्न गएको बताए ।

यता, विनिता देवीलाई भने पतिलाई कतार पठाएको मात्रै थाहा छ उनलाई । त्यसबाहेक केही जानकारी छैन । कुन कम्पनीमा काम गर्न, कुन म्यानपावर कम्पनीमार्फत् गए केही थाहा नरहेको बताउँछिन् ।

दुखि मण्डल विदेश जाँदा घरमा कुनै कागजात समेत नभएकोले उनलाई खोज्न पनि गाह्रो भएको छ । एकातर्फ उनीसँगै बस्ने कपिलले दुखि नेपाल फर्केको बताउँदा विभिन्न शँका उपशँका उब्जेको छ ।

सउदीमा रहेका नेपालीहरुलाई अनोहोरा कम्पनीमा दुखिलाई खोजी गरिदिन बिनिताले आग्रह गरेकी छिन् ।