कृष्णाष्टमी मेला नलगाऔँ, नाचगान नगरौँः प्रशासन

न्यूज ब्यूरो, जनकपुरधाम । भोली हुने कृष्णाष्टमीको अवसरमा लाग्दै कुनै पनि मेला नलगाउन स्थानीय प्रशासनले सूचना जारी गरेको छ ।

जिल्लामा निषेधाज्ञा लागेको बेला विभिन्न ठाउँमा कृष्ण जन्माष्टमीको अवसरमा लगाउने मेला, नाचगान जस्ता कार्यक्रमहरु नगर्न सूचना जारी गरेको हो । धनुषाका प्रमुख जिल्ला अधिकारी बन्धु प्रसाद वास्तोलाद्धारा जारी गरिएको सूचनामा निषेधाज्ञा उलँघन गर्नेलाई कारवाही गरिने जनाइएको छ ।

जिल्ला प्रशासन कार्यालय धनुषाबाट आईतबार जारी गरिएको सूचनामा धनुषा जिल्लाको कोभिड–१९ को अवस्थालाई मध्यनगर गर्दै निकट भविष्यमा आउने चाडपर्व सहित कृष्ण जन्माष्टमीको अवसरमा परापूर्वकालदेखि लाग्दै आएको मेलाहरु नलगाउन सूचना जारी गरिएको हो ।

कुनै पनि प्रकारको महोत्सव, नाचगान, भीडभाडको कार्यक्रम, साँस्कृतिक कार्यक्रम, रोटेपिँग जस्ता कार्यक्रमहरु नगर्न सूचना जारी गरिएको हो । ग्रामिण भेकमा कोरोनाको महामारी पिक अवस्थामा हुँदा पनि मेला, महोत्सव र भीडभाडका कार्यक्रमहरु भने रोकिएनन् ।

पूर्वी धनुषाको विभिन्न स्थानमा भारतबाट महिलाहरु मगाएर ओरकेष्ट्रा, छोकरबाजी लगायतका नाचहरु गराउने गरेको छ । नजिकको प्रहरीकै सँरक्षणमा सो कार्यक्रमहरु गरिदै आएको छ ।

जिल्ला प्रहरी कार्यालय धनुषाले समेत यस्ता कार्यक्रमहरुको लागि स्थानीय जनप्रतिनीधी, नेताहरुको दबाबमा भीडभाडको कार्यक्रमहरु गर्न सिफारिस गर्ने गरेको देखिन्छ ।

जिल्ला प्रशासन कार्यालय धनुषाले विभिन्न समयमा सूचना जारी गरेपनि लागू भने शून्य प्रतिशत हुन्छ । प्रशासनको आग्रह, सूचनालाई जिल्लावासीले रतिभर पनि मानिरहेको अवस्था छैनन् ।