जनकपुरः रोड बनाउन थालेपछि ८ घण्टामा खुल्यो पुलचोकको चक्काजाम

न्यूज ब्यूरो, जनकपुरधाम । जनकपुरको पुलचोक स्थित युवाहरुले गरेको चक्काजाम झण्डै ८ घण्टापछि खोलिएको छ ।

स्थानीय प्रशासन र युवाहरुबीच सहमति भएपछि चक्काजाम खोलिएको हो । उनीहरुले आजैदेखि रोड बनाउन सुरु नगरेसम्म चक्काजाम नखोल्ने अडान राखेपछि आजैदेखि सडक बनाउन सुरु गरिएको हो ।

जनकपुरधाम उपमहानगरपालिका वडा नम्बर १ पुलचोकदेखि कोल्ड स्टोरसम्म जाने बाटो जीर्ण भएपछि सर्वसाधारणलाई समेत आवतजावत गर्न कठिनाई भएको भन्दै युवाहरुले आज विहानैदेखि चक्काजाम गरेको थियो ।

विहान ९ बजेदेखि नै पुलचोकको चारै तर्फको सडकमा बाँसको भाटाले जाम गर्दै झण्डै ८ घण्टा चक्काजाम गरेको थियो । हुलाकी राजमार्ग आयोजनाका पदाधिकारी, जिल्ला प्रशासन कार्यालय धनुषाका प्रमुख जिल्ला अधिकारी (सिडिओ), जनकपुरधाम उपमहानगरपालिकाका पदाधिकारी, जनकपुरधाम उद्योग वाणिज्य सँघका अध्यक्ष जीतेन्द्र महासेठको उपस्थितिमा सडक बनाउने सहमति भएको हो ।

पुलचोकदेखि शहिदपथ (यदुकूहा) जाने बाटोमा कम्मरसम्मको पानी जमेपछि सवारी साधन समेत चल्न कठिनाई भएको थियो । कैयौँ जनाले सोही खाल्डोमा मोटरसाईकल लिएर दुर्घटना समेत निरन्तर भएपछि युवाहरुले सो सडक आजै बनाउन माग गरी चक्काजाम गरेको थियो ।

पुलचोक युवा क्लबका अध्यक्ष राधे यादव, उपाध्यक्ष किशन साह हुल साह, लक्ष्मण मण्डल, अजय साह, रवि साह, दिपेश साह, रँजीत साह, पँकज साह, देवन चौधरी, शैलेन्द्र यादव, छोटु पूर्वे लगायतका युवाहरुले झण्डै ८ घण्टा चक्काजाम गरेपछि डोजर लिएर लेबलिँग सुरु गरिएको हो ।

सो सडकमा अहिले जेसिबी लगाएर माटो लेबलिँगको कार्य सुरु गरिएको तथा भोली सोमबार ग्राभेलिँग गर्ने सहमति भएको हो । उद्योग वाणिज्य सँघका अध्यक्ष जीतेन्द्र महासेठले यसै हप्ताभित्र सो सडकमा पिच गर्नको लागि सहमति गर्न छलफल गर्ने आश्वासन दिएपछि चक्काजाम खोलिएको हो ।

सम्बन्धित निकायसँग समन्वय गरी कति दिनमा सो सडकमा पिच (कालोपत्रे) गर्ने भनेर यही हप्ताभित्र सहमति गर्ने प्रयास गरिने जनाइएको छ । चक्काजाम खोलाउनको लागि अध्यक्ष महासेठले सबै निकायसँग समन्वय गरेका थिए ।

चक्काजामको कारण विहानैदेखि सो सडकमा चल्ने हजारौ सवारी साधन जकथक परेको थियो ।