स्कूल एक प्रिन्सीपलले फेसबुकमा स्टेटस लेखेपछि सिरहाका पत्रकारहरुमा त्रास

न्यूज ब्यूरो, जनकपुरधाम । प्रदेश नम्बर २ को सिरहा जिल्लास्थित एक बोर्डिङग स्कूलका प्रिन्सीपलले फेसबुकमा स्टेटस लेखिदिएपछि सिरहाका पत्रकारहरु आतँक छाएको छ ।

प्रिन्सीपलको एक स्टेटसले सिरहाका पत्रकारहरु आतँकित बनेका छन् । नेपाल पत्रकार महासँघ सिरहा शाखाका पदाधिकारीहरुमा त्रास छाएको छ । स्टेटसपछि डराएका पत्रकारहरुले प्रहरी गुहारेका छन् ।

सिरहा जिल्लाको सदरमुकाम सिरहास्थित रहेको मर्निङग पर्ल (पियर्ल) सेकेण्डरी स्कूलका प्रिन्सीपल लोचन चोरबार (यादव) ले आफ्नो फेसबुकमा एक स्टेटस लेखेका छन् । उनले लेखेका छन्–“सिरहामा पनि मेयर द्धारिका लाल चौधरी जस्तो मेयर हुनुपर्छ, कि कसो साथीहरु ?”

यही स्टेटसले सिरहाका पत्रकारहरुमा अहिले त्रास छाएको छ । पत्रकार महासँघका सिरहा शाखाका सचिव शिव दयाल यादवले जिल्ला प्रहरी कार्यालय सिरहामा दिएको निवेदनमा प्रिन्सीपल यादवको स्टेटसले सिरहाका पत्रकारहरु आतँकित भएको लेखेका छन् ।

सो स्टेटसमा प्रिन्सीपल यादवले द्धारिका लाल चौधरी जस्तो मेयर हुनुपर्छ भनेर मात्र लेखेपछि सिरहाका पत्रकारहरु डराएका छन् । उनीहरु डराएको, आतँकित बनेको कुरा प्रहरीमा दिएको निवेदनमा प्रष्ट लेखिएको छ ।

यता, स्कूलका प्रिन्सीपल यादवले आफू सिरहाको विकासप्रति मात्र केन्द्रीत गरी स्टेटस लेखेपछि पत्रकारहरुले व्यक्ति मुद्दा बनाएको बताएका छन् । उनले आफू पत्रकारको “प” पनि नलेखेको बताउँदै स्टेटसमा इटहरीका मेयर द्धारिका लाल चौधरीको जिकिर गरेपछि अस्वभाविक रुपमा मुद्दा बनाएको बताएका छन् ।

उनले आफू पत्रकारको विषयमा केही पनि नलेखेको दाबी गर्दै भने, –“त्यो स्टेटसमा कहिँ कतै पत्रकार, कोहीलाई लक्षित गरेर लेखेको छु म ? अब अभिव्यक्ति स्वतन्त्रता पनि रहेनन् ? मेरो स्टेटसमाथि पत्रकारको आपत्ति र त्यसमाथि पनि प्रहरीमा उजुरी परेको कुरा सुनेर आफैँ अच्चमित छु । म त सिरहाको विकासलाई लक्षित गरेर स्टेटस हालेको थिए । स्टेटसमा जे भित्री भाव भएपनि मैले कही कतै पत्रकारलाई लक्षित गरेको छैन । कसैलाई लक्षित गरेर लेखेको भए सान्दर्भिक हुन्थ्यो ।”

भदौ ७ गते सोमबार उनले हालेको स्टेटसले सिरहाका पत्रकारहरु डराएका छन् । यद्यपी, पत्रकारहरु डराएपछि उनले सो स्टेटस फेसबुकबाट डिलिट गरिदिएका छन् ।

सो सन्दर्भमा जिल्ला प्रहरी कार्यालय सिरहाका प्रहरी प्रवक्ता सुभाष बुढाथोकीले पत्रकार महासँघबाट निवेदन परेकोले उनलाई छलफलको लागि मात्र बोलाएको प्रतिक्रिया दिए ।

पत्रकारसँग दुरव्यवहार गरी कडा बोलीको लागि सुनसरीको इटहरीका मेयर द्धारिका लाल चौधरी चिनिन्छ । उनको सो व्यवहारलाई चौतर्फी आलोचना भएको थियो ।