जनकनन्दिनी गाउँपालिका अध्यक्षको तस्विर हिलाम्य सडकमा झुण्डाइए

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकाका अध्यक्ष अब्दुल बारिक शेखको तस्विर सडकको बेरियर (ढाठ) मा झुण्डयाएर विरोध जनाइएको छ ।

स्थानीय अज्ञात व्यक्तिले हिलाम्य भएको एक सडकस्थित गाउँपालिका अध्यक्ष शेखको तस्विर झुण्डयाउँदै विरोध जनाएको छ । यो तस्विर इलाका प्रहरी कार्यालय खजुरीस्थितको रहेको छ ।

केही दिन अघि प्रदेश सरकारको सहयोगमा बनेको खजुरीदेखि इलाका प्रहरी कार्यालयसम्मको बाटो (स्टेशनदेखि उत्तर) मा ग्राभेल हालिएको थियो । ग्राभेल हाल्ने समयमै मुसलेधार बर्षा हुन थालेपछि सडकमा हिलो हुन पुगेको थियो ।

सोही क्रममा ट्रयाक्टरको जथाभावी प्रवेशले झन हिलाम्य बनेपछि इलाका प्रहरी कार्यालय खजुरीले बेरियर लगाएर बाटो सुकाउने प्रयास गरेका थिए । बाटोको पानी सुकेपछि बाटोमा निर्वाध आवतजावत हुने भन्दै इलाका प्रहरी कार्यालय खजुरीका ईन्चार्ज रबिन मैनालीले नै बेरियर लगाएका थिए ।

तर, पुनः पानी पर्नुका साथै स्थानीयहरुले ट्रयाक्टर भिजेकै सडकमा चलाएपछि झन हिलाम्य हुन पुगेको थियो । त्यसपछि इलाकाबाट निस्कने प्रहरीको गाडी समेत जान नसक्ने अवस्था भएपछि पुनः बैरियर लगाएर सडकलाई सुकाउने प्रयास गरेका थिए ।

सोही क्रममा अज्ञात व्यक्तिले गाउँपालिका अध्यक्ष अब्दुल बारिक शेखको फोटो लगाएर तथानाम लेखिदिएका छन् । प्रदेश सरकारको बजेटमा स्थानीय उपभोक्ता समिति बनाएर बनेको सो बाटोको लागि गाउँपालिकालाई जिम्मेवार ठहराउँदै अध्यक्षको फोटो झुण्डयाइदिएको हो ।

सो सन्दर्भमा गाउँपालिका अध्यक्ष शेखले बैरियरमा तस्विरका साथै लेखिएको शब्दहरु आफू कोही कसैसँग नगरेको भनेपछि उनलाई बदनाम गर्ने उदेश्यले मात्र त्यस्तो गरेको प्रतिक्रिया दिए । उनले व्यक्तिगत रिबसी वा पार्टीगत रिसबीको कारण अन्य व्यक्तिले गरेको गलतीमा आफूलाई समेत बदनाम गर्न खोजेको आरोप लगाए ।

उनले भने, –“बजेट प्रदेश सरकारले दिएको छ । गाउँपालिकाको विभिन्न ठाउँको लागि ४० लाख रुपैयाँ ग्राभेलको लागि दिएको थियो । त्यसमा गाउँपालिकाको कुनै सरोकार नै भएन । हामीलाई त कुनै खोजपुछ पनि भएन् । वडा नं.६ बस्ने देबेन्द्र यादवले उपभोक्ता समिति बनाएर सो काम गराएको छ । ”

यस सन्दर्भमा देबेन्द्र यादवसँग सम्पर्क गर्न खोज्दा उनले कार्यक्रममा व्यस्त भएको भनेर प्रतिक्रिया दिए ।

बैरियरमा “कोही माईका लालले ढाठ हटाउन सक्दैन” भनेर कोड गर्दै अध्यक्षको तस्विर झुण्डयाएको छ । अज्ञात व्यक्तिहरुले यसका साथै, जनकनन्दिनी गाउँपालिकामा स्वागत छ भनेर पनि लेखेका छन् ।

यता, इलाका प्रहरी कार्यालय खजुरीका प्रहरी ईन्चार्ज मैनालीले बैरियर आफूले लगाएको भन्दै अध्यक्षको फोटो झुण्डयाउनेको खोजी भइरहेको बताए । उनले सडक बनाउनको लागि आफूले समेत पहल गरेको भन्दै सकड बन्ने समयमै पानी पर्दा बिजोग भएको सुनाए ।

उनले यो सडकको अवस्थाको लागि गाउँपालिकाको अध्यक्षको कुनै सरोकार नरहेको बताउँदै बर्षाको कारण मात्र सडक बिग्रेपछि सडक सुकाउनको लागि ट्रयाक्टर निषेध गर्ने गरी मात्र बैरियर लगाएको बताए ।