प्रदेश २ः बाँसको भाटाले प्रहार गर्दा महिलाको घटनास्थलमै मृत्यू !

न्यूज ब्यूरो, बारा । बाराको महागढीमाई नगरपालिका वडा नम्बर ७ टोल तेलकुवामा शुक्रबार राति ८ बजेको समयमा मारपिट हुँदा एक जनाको घटनास्थलमै मृत्यु भएको छ ।

बच्चाहरुको झगडाको विषयलाई लिएर सिंघासन पासवानले सुखाडी पासवानकी श्रीमती मैना देवी पासवानलाई बाँसको भाठाले छाती हिर्काउँदा उनको घटनास्थलमै मृत्यु भएको हो ।

सिंघासन र सुखाडी पासवान दुवै दाजुभाई रहेको जिल्ला प्रहरी कार्यालय बाराका प्रहरी नायव उपरिक्षक गौतम मिश्रले बताए ।

सिंघासन अहिले फरार रहेको र उनको खोजी कार्य भइरहेको बाराका प्रहरी उपरीक्षक दिपेन्द्र शाहीले जानकारी दिए । मृतकाका लास पोस्टमार्टमका लागि बाराको कलैया अस्पतालमा राखिएको शाहीले बताए ।

मृतकका एक छोरी र दुई छोरा रहेका छन् । उनका श्रीमान रोजगारीका लागि अहिले काठमाडौंमा रहेका छन् ।