Breaking ! प्रदेश २ का आन्तरिक मामिला मन्त्री यादव पदबाट राजीनामा दिने मुडमा

न्यूज ब्यूरो, जनकपुरधाम । प्रदेश नम्बर २ को आन्तरिक मामिला तथा सूचना तथा सँचारमन्त्री ज्ञानेन्द्र कुमार राजीनामा दिने मुड बनाएका छन् ।

केन्द्र सरकार सहित देशको राजनीतिक उथलपुथलबीच प्रदेश नम्बर २ का आन्तरिक मामिला मन्त्रीले पनि राजीनामा दिने मुडमा रहेको बताएका छन् । उनले सँघीयता बचाउनको लागि राजीनामा दिन लागेको बताएका छन् ।

शुक्रबार अबेर राती न्यूज ब्यूरोसँगको सँक्षीप्त कुराकानीको क्रममा कानुनमन्त्री यादवले सँघीयता बचाउनको लागि हुन लागेको राजनीतिक उचारचढावबीच आफू राजीनामा दिने मुडमा रहेको बताएका छन् ।

प्रदेश नम्बर २ सरकारका प्रवक्ता समेत रहेका मन्त्री यादवले केन्द्र सरकारमा प्रतिगमनलाई परास्त गर्नको लागि अग्रगमनको साथ दिने उदेश्यले पनि आफू राजीनामा दिने मुडमा रहेको बताए ।

प्रदेश नम्बर २ मा माओवादी केन्द्रलाई समेत सामेल गराउने भएपछि उनले राजीनामा दिने मुडमा रहेको बताए । उनले भने, –“सँघीयता जोगाउनको लागि अहिले पार्टीहरु एक हुने अवस्था आएको छ । प्रदेश २ मा सत्ता समिकरणलाई हेर्दै मलाई स्थान छाडनुपर्ने अवस्था पनि आएको छ । सँघीयता जोगाउनको लागि आफ्नो पद त्याग गर्न तयार छु ।”

‘सर्वपक्षीय, सर्वदलीय सरकार निर्माण वर्तमानको आवश्यकता हो,’ उनले भने, ‘त्यसैले मैले राजीनामा दिन लागेको हुँ ।’ भन्दै मन्त्री यादवले भोलीसम्मको स्थिति अनुसार राजीनामा दिने मुडमा रहेको बताए ।

अर्कोतिर, अब प्रदेश २ सरकारमा माओवादी केन्द्रको सहभागिता हुने भएको छ । माओवादी केन्द्रका एक नेताका अनुसार शनिबार ३ बजे सरकारमा सहभागी हुने माओवादी केन्द्रका मन्त्रीहरुले सपथ लिने कार्यक्रम तय भएको छ ।

ती नेताका अनुसार माओवादी केन्द्रबाट संसदीय दलका नेता भरतप्रसाद साह मन्त्री हुने भएका छन् । त्यस्तै, माओवादी केन्द्रबाट रुवी कर्णलाई राज्यमन्त्रीको जिम्मेवारी दिन लागिएको छ ।

सोही भागबण्डको आधारमा माओवादी केन्द्रबाट आन्तरिक मामिला, सूचना तथा सँचार मन्त्रालय दिनुपर्ने अडानपछि मन्त्री यादवले सो पद त्याग गर्न राजीनामा दिन लागेको बताएका छन् ।

केन्द्रदेखि प्रदेश सरकारसम्म अहिले देशमा विभिन्न आन्दोलनबाट आएको सँघीयतालाई राम्ररी स्थापित नै नहुन दिएर सँघीयालाई खारेजीतर्फ उन्मुख गर्न खोज्ने प्रतिगमनकारीहरुलाई अहिले अग्रगमनकारी शक्तीहरु एक भएर परास्त गर्ने उनले बताए ।