पूर्वमन्त्री रघुवीर महासेठले राखे २५ लाख ईनाम

न्यूज ब्यूरो, जनकपुरधाम । पूर्व मन्त्री एवं एमालेका नेता महासेठले मिथिला नगरपालिकामा आफ्नो जग्गा सावित गर्नेलाई २५ लाख इनाम दिने घोषणा गरेका छन् ।

नेकपा एमालेक नेता एवं पूर्व मन्त्री रघुवीर महासेठ मिथिला नगरपालिकाको ढल्केवरमा आएको ट्रमा सेन्टर आफुले नै ल्याएको दावी गरेका छन् ।

धनुषाको मिथिला नगरपालिका वडा नं। ३ हरिहरपुरमा राष्ट्रिय धान दिसवको महोत्सवलाई मंगलबार सम्बोधन गर्दै धनुषा निर्वाचन क्षेत्र ४ का प्रतिनिधीसभा सदस्य समेत रहेका नेता महासेठले जग्गा उपलब्ध भए ढल्केवरमै ट्रमा सेन्टर बन्ने भन्दै जनतालाई न आतिन आग्रह गरे ।

ढल्केवरमा ट्रमा सेन्टरको लागि चाहिने जग्गा उपलब्ध नभए अर्को ठाउँमा सार्न सकिने तर पहिलो प्राथमिकता ढल्केवर नै रहेको नेता महासेठको भनाइ थियो । ट्रमा सेन्टर अन्यन्त्र सार्न लागेको गलत हल्ला फिँजाएर आफु सहित मिथिला नगरपालिकाका मेयरलाई बदनाम गर्न खोजिएप्रति आपति जनाए ।

नेता महासेठले मिथिला नगरपालिकाभित्रमा आफ्नो नाममा कसैले पनि एक धुर जग्गा सावित वा प्रमाणित गरिदिएमा २५ लाख रुपैयाँ इनाम दिने र आफ्नो सारा सम्पति उसैको नाउँ गरिदिने चुनौती समेत दिए ।

यसअघि नगर प्रमुख हरिनारायण महतोले समेत लालगढमा आफ्नो जग्गा कसैले प्रमाणित गरिदिए १० लाख रुपैयाँ पुरस्कार दिने बताएका थिए ।