सिरहा गोली काण्डः आफ्नै दाजुले भाईलाई गोली हान्न दिएका थिए सुपारी !

न्यूज ब्यूरो, सिरहा । प्रदेश नम्बर २ को सिरहा जिल्लास्थित आफ्नै जेठा दाजुले सम्पतिको रिसबीमा भाईमाथि गोली चलाएको खुलेको छ ।

गत जेठ २२ गते बेलुकी सिरहा जिल्लाको मिर्चैया बजारस्थित सिद्धि मेडिकलका सँचालक रामसागर साफीमाथि भएको गोली प्रहार काण्डमा सिरहा प्रहरीले तीन जनालाई पक्राउ गरेको हो ।

४० वर्षीय साफीलाई गोली प्रहार भएको घटनामा उनका दाजुसहित तीन जनालाई पक्राउ गरिएको सिरहा प्रहरीले जनाएको छ । अनुसन्धान तीव्र पारेर तीनै जनालाई पक्राउ गरी सार्वजनिक गरेको हो ।

सिरहा प्रहरीका प्रवक्ता एवम् डिएसपी शालिग्राम शर्माका अनुसार साफीमाथि गोली प्रहार गर्ने उनका दाजु ४२ वर्षीय सूर्यदेव साफी, गोलबजार नगरपालिका–११ का ४५ वर्षीय हकिम फकिर र मिर्चैया नगरपालिका–६ बस्ने २३ वर्षीय रोहित साफीलाई पक्राउ गरिएको हो ।

सूर्यदेवले पारिवारिक रिसईबी र सम्पत्तिको कारण आपराधिक समूहलाई पैसा दिई आफ्नै भाइमाथि गोली प्रहार गराएको प्रहरीको भनाइ छ । तीनै जनालाई नियन्त्रणमा लिई थप अनुसन्धान अगाडि बढाइएको प्रहरीले जनाएको छ ।

रामसागरमाथि दुईवटा गोली प्र’हार गरिएको थियो । एउटा गोली हातमा र अर्को खुट्टामा लागेको थियो ।