अधिकृत मण्डललाई हटाउन खोजेको भन्दै धनौजी गाउँपालिकामा स्थानीयहरुले गरे तालाबन्दी

न्युज ब्यूरो, जनकपुरधाम । धनुषाको धनौजी गाउँपालिकामा आज स्थानीय बासिन्दाहरुले तालाबन्दी गरेका छन् । उनीहरुले अधिकृतलाई हटाउन खोजेको भन्दै तालाबन्दी गरेको हो ।

धनौजी गाउँपालिकाका अध्यक्ष बद्रीनारायण सिँह र उपाध्यक्ष रामबति देवी मण्डल सहित केही जनप्रतिनीधिहरुले निमित्त प्रमुख प्रशासकीय अधिकृत गौरीशंकर मण्डललाई हटाएर नयाँ अधिकृत ल्याउन खोजेको भन्दै तालाबन्दी गरेका हुन् ।

विगत ४ वर्षमा आधादर्जन बढी प्रमुख प्रशासकीय अधिकृत फेरबदल गरेको धनौजी गाउँपालिकाका जनप्रतिनीधिहरुले प्रत्येक वर्ष विशेष गरी आर्थिक वर्ष सम्पन्न हुन लाग्दा अन्त्यमा आएर अधिकृत फेर्दै आएको छ ।

जनप्रतिनीधिहरुले कमिशन सहित गाउँपालिकामा गरेको भ्रष्टाचार लुकाउन तथा भागबण्डा नमिलेपछि आर्थिक वर्षको अन्त्यमा अधिकृत फेर्दै आएको छ । यस वर्ष पनि शून्य काम भएको धनौजी गाउँपालिकामा निमित्त प्रमुख प्रशासकीय अधिकृत मण्डललाई पनि सोही फार्मुला लगाएर हटाउन खोजेपछि स्थानीयहरु आक्रोसित भएका छन् ।

अन्य प्रमुख प्रशासकीय अधिकृतको तुलनामा गौरी शँकर मण्डलले निरन्तर कुशलपूर्वक कार्य सम्पादन गर्दै आएको भन्दै स्थानीयहरुले उनलाई हटाउन नमिल्ने अडान लिएका छन् ।

आईतबार दिउँसैदेखि सयौंको सँख्यामा आएका स्थानीयहरुले गाउँपालिका अध्यक्ष मुर्दावाद, अधिकृत हटाउन पाउँदैन जस्ता नारा सहित अधिकृत मण्डलको समर्थनमा तालाबन्दी गरेको हो ।