सिरहाको विपन्न वस्तीमा 'समाजिक सँस्था 'स्टोरिज अफ नेपाल' को राहत

न्युज ब्यूरो, सिरहा । प्रदेश नम्बर २ को सिरहा जिल्लास्थित दुई विपन्न वस्तीमा समाजिक सँस्था स्टोरिज अफ नेपालले राहत वितरण गरेको छ ।

सिरहाको लहान नगरपालिका स्थित दुई विपन्न बस्तीमा ‘स्टोरीज अफ नेपाल’ले मंगलबार राहत बाँडेको हो ।

वडा नम्बर १५ ढोढना स्थित लंग्राहा र वडा नम्बर २४ को डाँडाटोल मुसहर वस्तीमा ६० परिवारलाई राहत वितरण गरिएको हो । राहत प्याकेजमा १९ थरीका सामाग्री रहेको थियो ।

प्रति परिवार चामल २० किलो, पिठो ५ किलो, दाल ३ किलो, आलु ५ किलो, प्याज २ किलो, खानेतेल एक लिटर, च्युरा २ किलो , नुन १ किलो, चना ५०० ग्राम, सोयाबीन ५०० ग्राम, साबुन लुगा धुने र नुहाउने ५/५ पिस, थर्मोमिटर १ थान, नेलकटर एक थान, मास्क ५० पिस , जीवनजल ५ प्याकेट, मन्जन एक थान, प्याड २ प्याकेट र तौलिया १ पिसका दरले वितरण गरिएको थियो ।

प्रदेश २ का सिरहा, सप्तरी, धुनषा, पर्सा, महोतरीलगायत जिल्लामा पनि विपन्न परिवारलाई खाद्यान्न तथा व्यक्तिगत हेरचाह सामाग्री वितरण गरिएको स्टोरिज अफ नेपालका स्वयंसेवक विकास साहले बताए ।

खाद्यान्न तथा हेरचाह सामाग्री पाएपछि स्थानीयहरुले राहत वितरक संस्थाको प्रशंसा गरेका थिए । अशिक्षा, बेरोजगारी र जातिय भेदभावका कारण पिछडिएको दलित समदुायले चरम गरिबीको सामना गरिरहँदा कारोना महामारी र लम्बिदो निषेधाज्ञाका कारण छाक टार्ने समस्या खेप्नु परिरहेकोे छ ।

स्थानीय तहको नयाँ संरचनासंगै गाउँहरु नगरपालिकामा गाभिए पनि नगरका अधिकांश वडाहरुमा अझै पनि विकासले गति लिन सकेको छैन । नगरपालिका बनाइए पनि अवस्था दूर्गमकै । यसको प्रत्यक्ष असर समुदायले पनि भोग्नु परिरहेको स्थानीयले सुनाए ।