एउटै टोलमा ५ जनाको मृत्यू, सिँगो गाउँमा त्रास

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधामदेखि केही दुरीमा रहेको धनुषाको महेन्द्रनगरको एक टोलमा एक साताभित्रै ५ जनाको मृत्यू भएको छ ।

धनुषाको क्षीरेश्वरवनाथ नगरपालिकाको महेन्द्रनगर स्थित कुचाइ टोलमा एक हप्ता भित्र ५ जनाको मृत्यु भएको छ । शुक्रबार मात्रै यस टोलमा दुई जनाको मृत्यु भएको छ ।

शुक्रबार मृत्यु हुनेमा ६० वर्षीय राम सत सदा र ५५ वर्षीय सुगीया देवी रहेका छन् । यस अघि ६० वर्षीय सिता देवि, २१ वर्षीय एक युवक र एक ७० वर्षीय बृद्ध रहेका छन् ।

यसरी गाउँमा लगातार मृत्यु भएपछि अहिले गाउँमा त्रास फैलिएको छ । पहिले मृत्यु सामान्य रुपमा देखिए पनि एक पछि अर्को गरि लगातार मृत्यु हुने क्रम चलेपछि गाउँलेहरु त्रसित छन् ।

मृत्यु हुनेहरु सबै पहिले देखि नै कुनै न कुनै रोगले ग्रसित भएपनि अहिले प्राय ज्वरो, रुघा, खोकी र शरीर शिथील भई मृत्यु भएको मृतकका आफन्तजनले जनाएका छन् ।

स्थानीय रमेश खनालले मृत्यु हुनेहरु कसैको पिनि कोरोनाा परीक्षण नभएको बताए ।खनालले मृत्यु भएपनि काजक्रिया बाधा अबरोध हुने भन्दै परीक्षण गर्न कोहि नचाहेको बताए ।

मृत्यु हुनेहरु कुचाईका दलित समुदायको मुसहर बस्तीका हुन् । दैनिक ज्याला मजदुरी गरि जिविकोपार्जन गर्ने यी समुदायका व्यक्तिहरु अहिले विगत करिब एक महिना देखि कोरोना महामारी रोक्नको लागि जारी निषेधाज्ञाको कारण काम नपाएर भोक भोकै बस्नु परेको अवस्था भएको र त्यसमाथि पनि विमार भएपछि कमजोर भएर मृत्यु भएको हुन सक्ने अनुमान सोहि बस्तीका शिक्षक मिनबहादुरा तामाङ्गले गरेका छन् ।

शिक्षक तामाङ्गले भने, ‘मुसहर बस्तीका मानिसहरु अहिले निषेधाज्ञामा बाहिर काम गर्न नपाएर राम्रो संग खानपानको अभावमा अझ विमार पर्ने क्रम जारी रहेको छ ।’ उनले यस्ता गरिब दलित वस्तीमा राहत बन्दोबस्त गर्न स्थानीय सरकार तथा संघसंस्था संग माग गरे ।