जलेश्वरको भिठ्ठामोड सहित यी १३ वटा नाका खुल्ला गरियो

न्यूज ब्यूरो, जनकपुरधाम । छिमेकी मुलुक भारतमा कोरोनाको कहर बढदै जाँदा सरकारले नेपाल–भारत सीमामा कडाई गर्नुका साथै सीमाबाट आवतजावत समेत बन्द गरिदिएको छ ।

नेपालमा पनि दिनप्रतिदिन संक्रमितको संख्या उकालो लाग्ने क्रम नरोकिएपछि कोरोना भाइरस संक्रमणको चेन ब्रेक गर्नका लागि देशभर धनुषासहित ५८ जिल्लामा पूर्ण र ११ जिल्लामा आंशिक निषेधाज्ञा जारी गरिएको छ ।

जसमध्ये भारतसँग खुला सीमा जोडिएको पर्सा जिल्लासहित अन्य सीमा जोडिएका जिल्लाहरुमा पूर्ण रुपमा निषेधाज्ञा लगाइएको छ । यी जिल्लाहरुमा रहेका अन्तराष्ट्रि सीमानाका पनि बन्द गरिएकोमा सीसीएमसीको फिारिसमा मन्त्रिपरिषदको निर्णयसँगै अब ति नाकाहरु खुला रहने परराष्ट्र मन्त्रालयले जनाएको छ ।

निषेधाज्ञाको समयमा भारतबाट नेपाल आउन चाहनेहरुका लागि सरकारले महोत्तरीको भिठ्ठामोडसहित १३ वटा नाका खुला गरेको छ । कोरोना भाइरसको महामारीमा स्वदेशमै फर्किन चाहनेहरुलाई मध्यनजर गर्दै सुरक्षित र व्यवस्थित रुपमा प्रवेश गर्न दिइने शर्तमा सीमा खुला गरिएको परराष्ट्रमन्त्री प्रदीप ज्ञवालीले ट्वीटमार्फत जानकारी दिएका छन् ।

मन्त्री ज्ञवालीका अनुसार सुदूर पश्चिमबाट दार्चुलाको पुलाघाट, बैतडीको झुलाघाट, कञ्चनपुरको गड्डाचौकी, र कैलालीको गौरीफण्टा नाकाबाट आवश्यक प्रक्रिया पूरा गरेर नेपाल प्रवेश गर्न दिइने भएको छ ।

त्यस्तै, बाँकेको जमुनाह नाका, कपिलवस्तुको कृष्णनगर, रुपन्देहीको बेलहिया नाकाबाट पनि नेपाल प्रवेशको लागि अनुमति दिइएको छ । सीसीएमसीको निर्णय अनुसार नेपाल प्रवेशको लागि अनुमति दिइएका १३ नाकाहरुको नाम तल दिइएको छ ।

बीरगँज नाका, रौतहट जिल्लाको गौर नाका, महोत्तरीको भिठ्ठामोड नाका, कैलालीको गौरीफन्टा नाका, बाँकेको जमुनाह नाका, कपिलवस्तुको कृष्णनगर नाका, रुपन्देहीको बेलहिया नाका, दार्चुलाको पुलाघाट नाका, बैतडीको झुलाघाट नाका, कँचनपुरको गड्डा चौकी नाका, मोरँग विराटनगरको जोगबनी नाका, इलामको पशुपतिनगर नाकाबाट प्रक्रिया पुरा गरी आउन सक्ने बताइएको छ ।