जनकनन्दिनी गाउँपालिकामा ५ बेडको कोभिड अस्पताल र अक्सिजन सहित आईसोलेशन

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकाले ५ बेडको कोभिड अस्पताल सँचालनमा ल्याएको छ । सो सँगै ५ बेडको आईसोलेशन समेत सँचालनमा ल्याएको हो ।

वर्तमान अवस्थालाई मध्यनजर गरी केन्द्र सरकारको निर्देशन बमोजिम गाउँपालिकाले ५ बेडको कोभिड अस्पताल सँचालनमा ल्याएको जनकनन्दिनी गाउँपालिकाकी उपाध्यक्ष (उपप्रमुख) भारती कार्कीले जानकारी दिइन् ।

उनका अनुसार, खजुरीस्थित रहेको अस्पतालमा ५ बेडको कोभिड अस्पताल सँचालनमा ल्याइएको हो । अस्पतालमा जनशक्ति समेत दुरुस्त रुपमा परिचालन गरिएको जनाउँदै कोभिड सँक्रमितको उपचारको लागि बाहिर जानुपर्ने बाध्ता नहुने बताइन् ।

यसका साथै, खजुरीस्थित रहेको उच्च मावि खजुरीमा ५ बेडको अक्सीजन सहितको आईसोलेशन सँचालनमा ल्याएको हो । आईसोलेशनमा अहिले कुनै सँक्रमित नभएको जनाउँदै उपाध्यक्ष कार्कीले आईसोलेशनको आवश्कयता परेको गाउँपालिकाभित्रका नागरिकलाईलाई सुविधासम्पन्न आईसोलेशन प्रदान गरिने दाबी गरिन् ।

सोही क्रममा बाहिरबाट आउनेहरुको लागि २० बेडको क्वारेन्टाइन समेत व्यवस्थापन गरिएको हो । क्वारेन्टाइन र आईसोलेशनमा गाउँपालिकाले पौष्टिक आहारको व्यवस्थापन गरिने जनाइएको छ ।

आसपासका स्थानीय तहले अझै निर्णय समेत गर्न नसकेको अवस्थामा जनकनन्दिनी गाउँपालिकाले छोटो समयमा कोभिड अस्पताल सहित आईसोलेशन समेत सँचालनमा ल्याएपछि गाउँपालिकाका नागरिकलाई जनप्रतिनीधिप्रतिको विश्वास अझै बढेको छ ।