जनकपुरको प्रादेशिक अस्पतालमा आज ८ वटा भेन्टिलेटर लगाइँदै

न्यूज ब्यूरो, जनकपुरधाम । जनकपुरधामस्थित प्रादेशिक अस्पतालमा आज (शुक्रबार) थप ८ वटा भेन्टिलेटर जडान गरिने भएको छ ।

प्रदेश सरकारले अस्पतालमा भेन्टिलेटर जडानको लागि ११ वटा भेन्टिलेटर मगाएका हुन् । जसमध्ये ८ वटा जनकपुर प्रादेशिक अस्पतालमा जडान गरिने आपूर्ति विभागका डा. प्रमोद यादवले जानकारी दिए ।

यसअघि अमेरिकन एम्बेसीबाट स्वास्थ्य तथा जनसँख्या मन्त्रालयको सहयोगमा ७ वटा भेन्टिलेटर प्रादेशिक अस्पतालमा जडान गरिएको जनाउँदै उनले थप ८ वटा आज जडान गर्न लागिएको बताए ।

उनका अनुसार, बाँकी तीन वटा भेन्टिलेटर प्रदेशको अन्य जिल्लामा जानेछ । जसको लागि सिरहा अस्पतालबाट माग गरिएकोले त्यहाँ जाने सम्भावना रहेको उनले बताए । प्रादेशिक अस्पतालमा भेन्टिलेटर माग बमोजिम परिपूर्ति गरिएको थपे ।

अस्पतालमा भौतिक पूर्वाधारको उपलब्धताको आधारमा भेन्टिलेटर प्रदान गरिने डा. यादवले जनाए । कोभिड महामारीमा भेन्टिलेटरको आवश्यकतालाई मध्यनजर गर्दै थप भेन्टिलेटर जडान गर्न लागिएको बताइएको छ ।

प्रादेशिक अस्प्तालमा थप भेन्टिलेटर जडान भएपनि विभिन्न ठाउँबाट गम्भिर खालको रोग वा प्रकृतिका विरामीलाई भेन्टिलेटरमा राखेर उपचार गर्न सजिलो हुने विश्वास गरिएको छ ।

जानकारी अनुसार, प्रादेशिक अस्पताल जनकपुरमा बिग्रेको पुरानो भेन्टिलेटर पनि मर्मत गरी सुचारु गरिएको जनाइएको छ ।