धनुषाका एक मेयर र तीन उपमेयरको पद धरापमा

न्यूज ब्यूरो, जनकपुरधाम । धनुषाका एक मेयर र तीन उपमेयरको पद धरापमा परेको छ । ओली पक्ष एमालेमा लागेको भन्दै माओवादी केन्द्रले धनुषाका एक मेयरसहित तीन उपमेयरलाई स्पष्टीकरण सोधेपछि पद धरापमा परेको हो ।

केहिदिन अघि ओली पक्षमा लागेको भन्दै रौतहटका दुई मेयरसहित पाँच उपमेयरलाई पार्टीबाट निस्काशन गर्न निर्वाचन आयोगमा पत्र पठाएको माओवादी केन्द्रले धनुषामा पनि एक मेयरसहित तीन उपमेयरलाई स्पष्टीकरण सोधेको हो ।

ओली पक्षमा लागेका धनुषाका विदेह नगरपालिकाका मेयर बेचन दास, सोही नगरपालिकाकी उपमेयर निलम देवी मण्डल, सहीदनगर नगरपालिकाकाकी उपमेयर शिला देवी कापर र सबैला नगरपालिकाकी उपमेयर निलुदेवी कापरलाई माओवादी केन्द्र जिल्ला कमिटी धनुषाले कार्बाही स्वरुप पहिलो चरणमा स्पष्टीकरण सोधेको हो ।

माओवादी केन्द्र धनुषाका ईन्चार्ज योग कुमार बरबरिया यादव (श्रवण) र जिल्ला सचिव दीपक यादवले हस्ताक्षरसहित सोधिएको स्पष्टीकरण पत्रमा चारैजनालाई तीनदिन भित्र लिखति जवाफ पेश गर्न निर्देशन दिइएको छ ।

स्पष्टीकरण पत्रमा सर्वोच्च अदालतको निर्णय अनुसार पार्टी पुरानै अवस्थामा फर्केतापनि पार्टीको कार्यक्रमहरुमा तपाईंको सहभागिता के कति कारण भइरहेको छैन ? तपाईंको आफ्नो स्थानीय तहमा पार्टीको पक्षमा क्रियाशीलता के कति कारणले छैन ? र तपाईंले नेपाल कम्युनिष्ट पार्टी माओवादी केन्द्र त्याग गरेको हो वा होइन ? भनी तीन ओटा प्रश्न सोधिएकोछ ।

पार्टीले सोधेको स्पष्टीकरणको चितबुझ्दो जवाफ तीन दिन भित्र पार्टी कार्यालयमा पेश गर्न समेत निर्देशन दिइएको छ । उनीहरुले चित्तबुझ्दो जवाफ नदिए थप कार्बाही प्रक्रिया अघि बढाउने माओवादी केन्द्र धनुषाले जनाएको छ ।