'जनकपुर र राजविराजको विद्यालय बन्दको निर्णय भएको छैन'

न्यूज ब्यूरो, जनकपुरधाम । आज बिहानै मन्त्रीपरिषदको बैठकबाट विभिन्न १४ वटा जिल्लाको शहरी क्षेत्रका विद्यालयहरु बन्दको निर्णय गरिएको छ ।

सो क्रममा धनुषाको जनकपुर र सप्तरीको राजविराजक्षेत्रको विद्यालय बन्दको कुनै निर्णय नभएको बताइएको छ । मन्त्रीपरिषदले प्रदेश २ को बारा र पर्सा सहित अन्य १४ वटा अति प्रभावित जिल्लाहरुमा विद्यालयमा भौतिक नभई अनलाईन कक्षा सँचालन गरी अध्ययन अध्ययापन गराउन निर्णय गरेको हो ।

जिल्ला समन्वय समिति धनुषाका प्रमुख ईश्वरी प्रसाद ज्ञवालीले मन्त्रीपरिषदको बैठकमा धनुषा कोरोना प्रभावित जिल्लाको सूचिमा नराखिएको र अहिले अवस्था समेत समान्य रहेकोले विद्यालयहरु बन्दको अवस्था नभएको बताएका छन् ।

अति प्रभावित क्षेत्रको १४ वटा जिल्लामध्ये धनुषा नपरेकोले यहाँको विद्यालयहरु बन्दको अहिले कुनै निर्णय नभएको बताए । सो क्रममा जनकपुरधाम उपमहानगरपालिकाका शिक्षा सँयोजक मेहीलाल यादवले समेत कुनै निर्णय नभएको बताएका छन् ।

न्यूज ब्यूरोसँगको कुराकानीमा उनले जनकपुर क्षेत्रभित्रको विद्यालयहरु बन्द गर्ने अहिलेसम्म कुनै निर्णय नभएको प्रतिक्रिया दिए । यसलाई जनकपुरधाम उपमहानगरपालिकाका मेयर निकट श्रोतले समेतले विद्यालय बन्दको कुनै निर्णय नभएको जानकारी दिएको छ ।

केही मिडियाहरुमा प्रभावित जिल्लाको शहरी क्षेत्रका विद्यालयहरु बन्द गर्ने मन्त्रीपरिषदको निर्णय अनुसार जनकपुर र राजविराजमा समेत विद्यालय बन्दको निर्णय गरिएको जानकारी सम्प्रेषण गरिएपछि अधिकारीहरुले त्यस्तो कुनै निर्णय नभएको बताएका छन् ।

सरकारले प्रदेश नम्बर २ को बारा र पर्सा सहित काठमाडौं, ललितपुर, कास्की, रुपन्देही, चितवन, बाँके, भक्तपुर, कैलाली, मोरङ, दाङ, सुर्खेत, बागलुङलाई मन्त्रालयले अतिप्रभावित भनी वर्गीकरण गरेको हो ।

यता, राजविराज नगरपालिकाभित्रको शैक्षिक सँस्थानहरु बन्दको बारेमा राजविराज नगरपालिकाकी उपप्रमुख साधना झाले विद्यालय बन्द गर्ने सम्बन्धी अहिलेसम्म कुनै निर्णय नभएको बताएकी छन् ।

उनले मन्त्रिपरिषदको निर्णयमा अति प्रभावित जिल्लाका शहरी क्षेत्रका विद्यालयहरु बन्द गरी अनलाईन कक्षा सँचालन गर्न भनिएपनि सो १४ वटा अति प्रभावित जिल्लामा सप्तरी र त्यसमा राजविराज नपरेको र अवस्था समेत नबिग्रेको भन्दै बन्दको निर्णय नगरिएको बताइन् ।

उनले कोभिडिलाई मध्यनजर गर्दै राजविराजको एक विद्यालयले पूर्व सतर्कता अपनाएको भनेर विद्यालय बन्द गरेपनि नगरक्षेत्रभित्रको विद्यालयहरु बन्दको कुनै निर्णय नभएको बताइन् ।