एकतर्फ मधेशका नेता र मन्त्रीहरुको मस्ती, अर्का तर्फ शहिद परिवारको रोदन

न्यूज ब्यूरो, जनकपुरधाम । प्रदेश २ को अस्थायी राजधानी जनकपुरधामस्थित मधेश भवनभित्र आयोजना गरिएको नयाँ वर्षको शुभकामना आदान प्रदानको क्रममा शहिद परिवारहरुले नारावाजी गरेको छ ।

मंगलबार प्रदेश २ को भौतिक पूर्वाधार विकास मन्त्रालयले राखेको नयाँ वर्ष २०७८ तथा सिरुवा पर्वको अवसर पारेर शुभकामना आदानप्रदान तथा चियापान कार्यक्रममा शहिद परिवारहरुले आफ्नो माग पुरा गर्न नारा धन्काए ।

कार्यक्रममा प्रदेशका केही मन्त्रीका साथै जनता समाजवादी पार्टी (जसपा) का अध्यक्ष महन्थ ठाकुर, वरिष्ठ नेता राजेन्द्र महतो, नेता शरदसिंह भण्डारी पनि उपस्थित भए । पार्टीका अन्य नेता र कार्यकर्तासहित अन्य क्षेत्रका व्यक्ति पनि उक्त कार्यक्रममा आमन्त्रित थिए ।

टेन्टभित्र मन्त्री, नेता तथा कार्यकर्ता हर्षित मुद्रामा शुभकामना आदानप्रदान गरिरहँदा बाहिर विरोध प्रदर्शन गरिरहने समूह थिए मधेश आन्दोलनका शहीदका परिवार ।

जसले केन्द्र र प्रदेश सरकारबाट आफूहरुको माग पूरा हुने आश्वासन मात्र पाएका थिए । मंगलबार पनि टेन्टभित्र रहेका मधेशका नेता र प्रदेश सरकारका मन्त्रीसँग शहीद परिवारको भेट भएन ।

एक शहीद परिवारलाई एक रोजगार उपलब्ध गराउने प्रदेश सरकारले प्रतिबद्धता जनाए पनि पूरा नगरेको गुनासो शहीद परिवारको छ । ‘धेरैलाई जागिरै दिइएको छैन’ शहीद परिवार तथा आन्दोलनमा घाइते भएका परिवारको हकहित संरक्षणका लागि गठन भएको समितिका संयोजक रामनरेश राय यादवले भने, ‘जागिर दिएकाहरुलाई पनि करारमा नियुक्त गरिएको छ ।’

उनका अनुसार प्रदेश सरकारले ५४ जनालाई नियुक्ति पत्र वितरण गरेपनि २८ जनाले जागिर पाएका छैनन् । यसबाहेक प्रदेश सरकारले मधेशी शहीद स्मृति प्रतिष्ठान गठन गर्ने प्रतिवद्धता जनाए पनि गरेको छैन ।

२०६३ सालको मधेश आन्दोलनमा पति गुमाएकी सर्लाहीकी सुमित्रा यादवले स्थानीय नेतादेखि मन्त्रीसम्मले पटक–पटक आश्वासनबाहेक केही नदिएको बताइन् ।

भौतिक पूर्वाधार विकासमन्त्री जितेन्द्र सोनलले आयोजना गरेको कार्यक्रममा जसपाका अध्यक्ष ठाकुर, वरिष्ठ नेता महतो, नेता भण्डारीलाई बोलाइयो । तर पूर्वसमाजवादी पार्टीबाट प्रतिनिधित्व गर्ने प्रदेश २ का मुख्यमन्त्री र मन्त्रीहरु भने कार्यक्रममा गएनन् ।