मारवाडी युवा मँच जनकपुरद्धारा विद्यालयमा पँखा, बत्ति सहित खेलकूद समाग्री प्रदान

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधाम स्थित रहेको पशुपति शिक्षा मन्दिर विद्यालयमा मारवाडी युवा मँचले भौतिक समाग्री प्रदान गरेको छ ।

जनकपुरधाम उपमहानगरपालिका वडा नम्बर ८ रत्नसागरस्थित रहेको पशुपति शिक्षा मन्दिर (विद्यालय) मा विद्यार्थीहरुको लागि गर्मीमा पँखा, बिजुली बत्ति, खेलकूद समाग्री, बिस्कुट तथा पेयजल वितरण गरेको हो ।

समुदायिक विद्यालयमा भौतिक पूर्वाधारको कमी रहेको बेला मारवाडी युवा मँचले सो कमि कमजोरी महसुस गर्दै विद्यार्थीहरुलाई गुणस्तरीय शिक्षाको बल पुग्ने हेतु सो समाग्रीहरु प्रदान गरिएको युवा मँचका राहुल सिँघानीयाले जानकारी दिए ।

“हामीले केही दिन अघि सो विद्यालय भएर आयौं, विद्यालयमा भौतिक पूर्वाधारको अत्यंतै कमी जस्तै, शुद्ध खाने पानी ,डेस्क बेंच, ब्लैक बोर्ड ,पंखा ,बत्ती ,इत्यादि देखिएको थियो । अनि हामीले सो समाग्रीहरु सहयोगको निधो गरयौं ।”– सिँघानियाले भने ।

शिक्षा भविष्य र जीवन चियाउने आँखी झ्याल रहेको बताउँदै मँचका पदाधिकारीहरुले शिक्षा जीवनको उज्यालो र आशाको दियोलाई झन बल्नको लागि बल प्रदान गरिएको बताएको हो ।

“शिक्षा जीवन हो भने अशिक्षा मृत्यु । मृत्युलाई अन्धकार पनि भन्ने गरिन्छ । अशिक्षा त्यो अन्धकार हो जुन अन्धकारमा कुनैपनि वस्तुलाई राम्ररी देख्न र चिन्न सकिन्न । त्यसैले संस्कृत साहित्यले भन्छ–‘असतोमा सद्गमय, तमसोमा ज्योतिर्गमय, मृत्योर्मा अमृतंगमय ।’– यही नारा सहित सहयोग गरिएको बताइएको छ ।

आगामी दिनमा यस विद्यालय लाइ डेस्क बेंच तथा अन्य सहयोग गर्ने प्रतिबद्धता मारवाड़ी युवा मंचले समेत गरेको छ ।

कार्यक्रममा मारवाड़ी युवा मंच जनकपुरका कार्यसमिति पदाधिकारीले विद्यार्थीहरु बीच ज्ञान तथा मोटिवेशनल मंतव्य समेत राखेका थिए।