धनुषाः जनकनन्दिनी गाउँपालिका प्रशासनीक भवनको शिलान्यास, आगामी आर्थिक वर्षमा तयार हुने

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकाको प्रशासनीक भवनको एक कार्यक्रमबीच शिलान्यास गरिएको छ ।

जनकनन्दिनी गाउँपालिकाको वडा नम्बर ४ स्थित रहेको परसाहा (खेल मैदान) स्थित सो भवनको शिलान्यास गरिएको छ ।

गाउँपालिका अध्यक्ष अब्दुल बारिक शेख र गाउँपालिकाकी उपाध्यक्ष भारती कार्कीले विधिवत रुपमा बुधबार विहान भूमिपूजन गरी शिलान्यास गरेको हो ।

दुई तल्ले प्रशासनीक भवनको लागि निकालिएको इ–बीड अनुसार भवनको शिलान्यास आज गरिएको हो । अहिले बीड पूरा नभएपनि तत्कालै १ करोड ५ लाख रुपैयाँ छुटयाइएको जनाइएको छ ।

आउँदो आर्थिक वर्ष २०७८÷०७९ मा थप रकम विनियोजन गरी दुई तल्ले भवन निर्माणलाई पूर्णता दिइने गाउँपालिकाका प्रमुख प्रशासकीय अधिकृत अयोधी दासले जानकारी दिए ।

दासका अनुसार, भवनको लागि ४ करोड बढी रुपैयाँ बीड गरिएपनि हाललाई १ करोड ५ लाख रुपैयाँ विनियोजन गरी कार्य सुचारु गरिने बताए ।

जनकनन्दिनी गाउँपालिका वडा नम्बर ४ र ३ को बीचमा अहिले रहेको भाडाको घरमा सँचालन हुँदै आएको छ । प्रशासनीय निकायको दृष्टिकोणले कार्य सहजता नभएको भन्दै भवन बनाउने कार्यलाई जोड दिएको बताए ।

सो क्रममा गाउँपालिका उपाध्यक्ष भारती कार्कीले भूमिपूजन भएपछि भवन निर्माणको कार्य पनि तीव्र हुने बताइन् । प्रशासनीक भवन सँचालनमा आएपछि आम नागरिकलाई कार्य सहजता हुने बताइन् ।

शिक्षा, स्वास्थ्य र भौतिक पूर्वाधारको लागि विकासको महसुस गराएको जनकनन्दिनी गाउँपालिकाले प्रशासनीक भवन बनाएपछि नागरिकलाई सेवा लिन झन सहज हुने विश्वास लिएको छ ।

भवनको शिलान्यास भएपछि हुने कार्य आगामी आर्थिक वर्षको अन्त्यसम्म भवन सँचालनमा आउने बताइएको छ ।