मधेशको महाकुम्भ 'परिक्रमा' भोली धनुषाधाम आउने, पर्वतामा भव्य स्वागतको तयारी

न्यूज ब्यूरो, जनकपुरधाम । मधेशको महाकुम्भ मानिने १५ दिने माध्यमिकी परिक्रमाको धार्मिक लस्कर भोली धनुषाधाम आउने भएको छ ।

छिमेकी मुलुक भारत हुँदै महोत्तरीमा ५ दिन विश्राम लिएका परिक्रमाको धार्मिक लस्कर आईतबार धनुषाको धनुषाधाम नगरपालिकाको वडा नम्बर ५ पर्वतास्थित विश्राम गर्ने भएको छ ।

पर्वतामा विश्राम गरी सोमबार धनुषाधामकै वडा नम्बर ३ स्थित रहेको ऐतिहासिक धनुषाधाममा विश्राम गर्ने भएको छ । धार्मिक लस्करको स्वागतको लागि वडा नम्बर ५ का वडाध्यक्ष ईन्द्र कुमार महतोले विशेष व्यवस्था गरेको बताएका छन् ।

मिथिला बिहारी र किशोरीजीको डोलासहित परिक्रमा यात्रीलाई स्वागत गर्न बृहत सरसफाइ कार्यक्रम गरिएको छ । शनिबार पर्वतामा धार्मिक लस्करलाई मध्यनजर गर्दै वृहत सरसफाई गरिएको हो ।

१५ दिवसीय परिक्रमाको महत्वपूर्ण विश्रामस्थल मध्ये एक हो पर्वता । पर्वतामा साधुसन्तहरुको स्वागतमा पर्वतामा बृहत सरसफाई वडा अध्यक्ष इन्द्रकुमार महतो पहलमा गरिएको छ ।

परिक्रमा यात्रीको लागि नगरपालिकाले निःशुल्क शिविर संचालन गरेको छ । वडा नम्बर ५ को स्वास्थ्य चौकीले परिक्रमा यात्रीको लागि निःशुल्क स्वास्थ्य शिविर, निःशुल्क दाउरा वितरण, पराल वितरणसहित निःशुल्क खाजाको समेत व्यवस्था गरिएको वडाध्यक्ष महतोले बताए ।

वडाध्यक्ष महतोका अनुसार पर्वतामा परिक्रमा डोलाका लाग्ने गरेको भव्य मेलामा आफन्तलाई भेट्न नसकेका श्रद्धालुभक्तजनको लागि माइकिंगको व्यवस्था समेत गरिएको छ ।

धनुषाधाम नगरपालिकाका मेयर बालेश्वर मण्डलले नगरपालिकाको तर्फबाट डोलाका महन्थहरुलाई सम्मान समेत गरिने कार्यक्रम रहेको बताएका छन् । सोमबार धनुषाधाम पुग्ने परिक्रमावासीले मँगलरबार सबैला नगरपालिकाको सतोषर पुग्नेछ भने बुधबार औरही पुगेर पुनः भारत पुग्नेछ ।