प्रदेश २ः कोरोना भ्याक्सीन लगाएपछि मृत्यू, घटना लुकाउन खोजेको आरोप

न्यूज ब्यूरो, रौतहट । कोरोना भ्याक्सीन लगाएपछि एक वृद्धको मृत्यू भएको आरोप लगाइएको छ । भ्याक्सीन लगाएको ८ घण्टापछि उनको मृत्यू भएको परिवारजनको आरोप छ ।

सरकारले ६५ बर्षमाथिका मानिसहरुलाई निःशुल्क खोप लगाउन आग्रह गरेको थियो । सोही क्रममा कोरोना विरुद्धको भ्याक्सीन लगाएको ८ घण्टापछि उनको मृत्यू भएको बताइएको छ ।

रौतहटको गरुडा नगरपालिका वडा नम्बर ३ मलाही बर्ष ७१ की वर्षीया धनमन्ती देवी मलाहको कोरोनाको भ्याक्सीनकै कारण मृत्यू भएको आरोप परिवारजनले लगाएको हो ।

खोप लगाएको केही समयपछि ज्वरो र श्वासप्रश्वासमा समेत कमि भई लगातार वान्ता (उल्टी) भएपश्चात मृत्यु भएको परिवारजनले जनाएका छन् ।

गत फागुन २४ गते दिउँसो २ः३० बजेको समयमा मलाही स्वास्थ्य चौकीमा खोप लगाएर घर फर्के लगतै ज्वरो आएको र श्वास प्रश्वासमा कमी र लगातार वान्ता हुँदै करीब साढे १० बजे राति मृत्यु भएको बताइएको छ ।

उनको मृत्यू भएपछि कोरोना भ्याक्सीनले नै मृत्यू भएको भन्दै भोलीपल्ट विहान स्वास्थ्य चौकीमा आक्रोसित परिवारजनले हो हल्ला गरेपछि प्रहरी पुगेको थियो ।

अनुसन्धानका लागि खटेका सुशील पाण्डे सहितका व्यक्तिले वृद्ध शरीरलाई पोष्टमार्टम किन गराउने सम्बन्धित जिल्ला प्रहरी र सिडियोलाई घटना बारे जानकारी गराइ सकिएको भनी शवको पोष्टमार्टम गराउन दिएन । दाहसंस्कारपछि सहयोगका लागि कुनै पहल नभएको उनले गुनासो गरेका हुन्।

पिडीत परिवारले कोरोना भ्याक्सिन लगाएकै कारण मृत्यु भएको आरोप लगाइरहेका छन भने समुदायमा त्रास नफैलोस उद्देश्यले सम्बन्धित निकाय घटना लुकाउन खोजिरहेको बताइएको छ ।

घटना बारे रौतहटका प्रमुख जिल्ला अधिकारी इन्द्रदेव यादवले अनभिज्ञता प्रकट गर्दै आफुलाई थाहा नभएको बताएका छन् भने रौतहटमा यस्तो कुनै घटना भएको आफ्नो जानकारीमा नरहेको बताए ।

यता, प्रदेश स्वास्थ्य निदेर्शनालयका निमित्त निर्देशक विजय झाले कारोना मृत्यु खोप लगाएको दिन धनमन्तीको मृत्यु भएको हो तर खोपकै कारण मृत्यु भने नभएको बताए ।

“कोरोनाविरुद्धको भ्याक्सिन लगाएपछि त्यसको असर आधा घण्टामै देखिने भएकोले मृतकमा त्यस्तो कुनै लक्षण आधा घण्टाभित्र देखिएको थिएन । त्यसैले उनको मृत्युको कारण भ्याक्सिन नै हो भन्न मिल्दैन ।”– उनले भने ।

६५ बर्षमाथिका वृद्धहरुलाई सरकारले लगाएको कोरोना खोपको क्रममा धेरै ठाउँमा असरहरु देखिएको थियो । चिकित्कहरुका अनुसार, दीर्घरोगीहरुले खोप लिँदा समस्या देखिएको थियो । अर्को विरामीको औषधी सेवन गरिरहेको तर समयमा डोज नलिने विरामीको लागि केही समस्या उत्पन्न भएको बताइएको छ ।