लहानको मालपोत बम विस्फोट प्रकरणमा सिसिटिभीको आधारमा एक जना पक्राउ !

न्यूज ब्यूरो, सिरहा । आईतबार दिउँसो सिरहाको लहानस्थित मालपोत कार्यालयमा बम विस्फोट गराउने शँकास्पद व्यक्ति पक्राउ परेका छन् ।

जिल्ला प्रहरी कार्यालय सिरहा र सशस्त्र प्रहरी बेस क्याम्प सिरहाको सँयुक्त पहलमा सिसिटिभी फुटेजको आधारमा उनलाई पक्राउ गरिएको जनाइएको छ ।

पक्राउ पर्नेमा लहान नगरपालिका वडा नम्बर १८ भदिया गाउँ बस्ने अन्दाजी बर्ष २६ का बलराम मण्डल रहेका छन् । उनलाई सिसिटिभी फुटेजको आधारमा पक्राउ गरिएको हो ।

सशस्त्र प्रहरी सिरहाका एसपी दिपेश गिरीका अनुसार, आईतबार दिउँसो करिब १ बजेको समयमा भएको बम विस्फोटपछि सशस्त्र प्रहरीले सिसिटिभी फुटेज नियन्त्रणमा राखेर अनुसन्धान अगाडी बढाएको थियो ।

मण्डललाई सिरहा जिल्ला स्थित सुखिपुर नगपालिकास्थितबाट पक्राउ गरिएको जनाईएको छ ।

राष्ट्रिय अनुसन्धान विभाग र नेपाल प्रहरीको सूचनाको आधारमा मण्डललाई पक्राउ गर्न निर्देशन अनुसार पक्राउ गरिएको हो । उनलाई अहिले केही बेरमै नेपाल प्रहरीलाई जिम्मा लगाउने एसपी गिरीले जानकारी दिए ।

मण्डललाई सिसिटिभीको आधारमा अनुसन्धानको क्रममा पक्राउ गरिएको बुझिएको छ । बम विस्फोट भएको मालपोत कार्यालयमा जडान भएको सिसिटिभीमा मण्डल उपर शंकाको आधारमा पक्राउ गरिएको हो ।

यस सन्दर्भमा जिल्ला प्रहरी कार्यालय सिरहाका एसपी सुदीप भण्डारीले भने आफूलाई केही पनि थाहा नभएको प्रतिक्रिया दिए । यसबारे थप विवरण आउन बाँकी छ ।