सबैला नगर अस्पताल सञ्चालनका लागि मातृका यादवले एक महिनाको तलब दिने, एम्बुलेन्स पनि हस्तान्तरण गर्ने

न्यूज ब्यूरो, सबैला । धनुषाको सबैला नगरपालिकास्थित प्राथमिक स्वास्थ्य केन्द्रलाई स्तरोन्नति गरी १५ शय्याको नगर अस्पतालका रूपमा सञ्चालनमा ल्याइएको छ । अस्पतालको समुद्घाटन प्रतिनिधिसभा सदस्य तथा पूर्वमन्त्री मातृका प्रसाद यादवले गरेका छन् ।

अस्पताल सञ्चालनका लागि सांसद यादवले आफ्नो एक महिनाको तलब उपलब्ध गराउने घोषणा गरेका छन् । साथै, आफू अध्यक्ष रहेको सहिद प्रतिष्ठानको एम्बुलेन्ससमेत नगरपालिकालाई हस्तान्तरण गर्ने प्रतिबद्धता जनाएका छन् ।

सबैला नगरपालिकाका नगर प्रमुख कारीराम यादवको अध्यक्षतामा आयोजित कार्यक्रममा सांसद यादवले नगर अस्पताललाई व्यवस्थित, प्रभावकारी र जनमुखी बनाउन सबै राजनीतिक दल, जनप्रतिनिधि तथा सरोकारवालालाई नियमित अनुगमन र सहयोग गर्न आग्रह गरे । स्थानीय नागरिकले आफ्नै क्षेत्रमा सहज रूपमा स्वास्थ्य सेवा प्राप्त गर्न सक्ने वातावरण निर्माण गर्नु आवश्यक रहेको उनको भनाइ थियो ।

नगर प्रमुख कारीराम यादवले नगर अस्पताल सञ्चालनका लागि नगरपालिकाले पाँच करोड रुपैयाँ विनियोजन गरेको जानकारी दिए । अस्पताल सञ्चालनमा आएपछि सबैला नगरपालिका तथा आसपासका क्षेत्रका नागरिकलाई स्थानीयस्तरमै स्वास्थ्य सेवा प्राप्त गर्न सहज हुने उनले विश्वास व्यक्त गरे ।

नगर अस्पताललाई व्यवस्थित रूपमा सञ्चालन गरी नागरिकलाई गुणस्तरीय स्वास्थ्य सेवा उपलब्ध गराउने लक्ष्य रहेको बताउँदै नगर प्रमुख यादवले नगरलाई सफा, स्वच्छ र व्यवस्थित बनाउन पनि नगरवासीको सहयोग आवश्यक रहेको उल्लेख गरे ।

कार्यक्रममा नगर उपप्रमुख रहिमा खातुन, प्रमुख प्रशासकीय अधिकृत खिमबहादुर भुजेल, विभिन्न वडाका वडाध्यक्ष तथा कार्यपालिका सदस्य, राजनीतिक दलका प्रतिनिधि, स्वास्थ्यकर्मी, सामाजिक अगुवा र स्थानीयवासीको उपस्थिति थियो ।

१५ शय्याको नगर अस्पताल प्रभावकारी रूपमा सञ्चालन गर्न आवश्यक स्वास्थ्य जनशक्ति, औषधि, उपकरण तथा अन्य सुविधाको व्यवस्थापन महत्त्वपूर्ण हुने देखिन्छ । अस्पतालको सेवा नियमित र गुणस्तरीय बनाउन सके स्थानीय नागरिकलाई उपचारका लागि अन्यत्र जानुपर्ने बाध्यता कम हुने अपेक्षा गरिएको छ ।