धनुषाधाममा विवाहपँचमी भव्य रुपमा मनाउने तयारी

न्यूज ब्यूरो, जनकपुरधाम । धनुषाको एतिहासिक एवम् पर्यटकीय स्थल धनुषाधाममा समेत विवाहपँचमी (vivahpanchami) मनाउने तयारी गरिएको छ ।

आउँदो शनिबार जनकपुरमा धुमधामका साथ मनाइने विवाहपँचमी महोत्सवका साथै धनुषाधाममा पनि भव्य रुपमा मनाउने तयारी नगरपालिकाले गरेको हो । त्यसको लागि धनुषाधाम नगरपालिका वडा नं. ३ का वडाध्यक्ष राजकिशोर साहको सँयोजकत्वमा एक समिति समेत गठन गरिएको छ ।

यसका साथै सो समितिको सदस्यहरुमा वडा नं. १ का वडाध्यक्ष विश्वनाथ यादव, वडा नं. २ का वडाध्यक्ष प्रभु नारायण साह र ४ का परीक्षण यादवलाई चयन गरिएको छ । यसमा नेपाल प्रहरी र सशस्त्र प्रहरी भने आमन्त्रित सदस्य रहने जनाइएको छ ।

धनुषाधाममा विवाहपँचमीको तयारी सहित ठाउँ ठाउँमा गेट निर्माण, पोखरी सरसफाई, बजार सरसफाई देखि लिएर सहभागीताको लागि माईकिँग सहित मेलामा रामलीला समेत प्रदर्शन हुने सँयोजक यादवले जनाएका छन् ।

विवाहपँचमीको लागि लाग्ने सबै खर्च धनुषाधाम नगरपालिकाको तर्फबाट गरिने नगर प्रमुख बालेश्वर मण्डलले जानकारी दिए । उनले रामायणकालिन रामसीताको स्वयँवरमा भगवान रामले तोडेको धनुषको एक टुक्रा धनुषाधाममा खसेको भन्दै यहाँ पनि प्रत्येक वर्ष विवाहपँचमी मेला लाग्दै आएको छ ।

धनुष महाराजको अगाडीमै रहेको रामजानकी मन्दिरलाई केन्द्रीत गरी विवाहपँचमी मेला लाग्दै आएको छ ।