धनुषाः नेकपा र जनता समाजवादी पार्टीबीच झण्डै झडप ! (भिडियो सहित)

न्यूज ब्यूरो, जनकपुरधाम । पूर्वी धनुषाको कमला नगरपालिकामा सोमबार भएको नगर परिषद्को क्रममा दुई पार्टीबीच (nekapa vs jasapa) झण्डै झडप भएको थियो ।

कमला नगरपालिकाले आर्थिक बर्ष २०७७/०७८ को लागि गरेको नगर परिषदको क्रममा धर्नामा बसेका जनता समाजवादी पार्टी र परिषदको समर्थनमा आएका नेपाल कम्यूनिष्ट पार्टीबीच झण्डै झडप भएको थियो ।

परिषद चलेसम्म शान्तिपूर्ण धर्नामा बसेका जसपाका कार्यकर्ताहरुले परिषद सम्पन्न भएपछि नेकपाका नेता तथा कार्यकर्ताहरुले नारावाजी गरेपछि दुई तर्फा नारावाजी सहित झडपको माहौल बनेको थियो ।

सोही समयमा मोटो सँख्यामा परिचालन गरिएको नेपाल प्रहरी र शसस्त्र प्रहरीले स्थिति नियन्त्रणमा लिन सफल भएको थियो । ईलाका प्रहरी कार्यालय खजुरीका प्रहरी नीरिक्षक हिरेन्द्र रोकायाको कमाण्डमा गएको प्रहरी टोलीले स्थितिलाई नियन्त्रण गरेको थियो ।

यसका साथै, सशस्त्र प्रहरी बेश क्याम्प दुबरकोट हथलेटवाका प्रहरी नीरिक्षक अमर बरालको कमाण्डले सो स्थितिलाई नियन्त्रणमा लिएको थियो । परिषदको विरोधमा उत्रेका जसपा र परिषदको समर्थनमा उत्रेका नेकपाबीच नै झडपको स्थिति सृजना भएको थियो ।

झण्डै ३ घण्टा चलेको परिषदबाट चालु आर्थिक बर्षको लागि बजेट अनुमोदन गरिएपछि झन रिसाएका जसपाले नेकपाले परिषद विरोधी भनेपछि स्थिति उग्र भएको थियो । प्रहरी एक्सनमा आएपछि दुवै पक्षलाई दुरी बनाइदिएर स्थिति नियन्त्रणमा लिन सफल भएको थियो ।

जनता समाजवादी पार्टी हरहिसाब नदिएको, भ्रष्टाचार गरेको भन्दै परिषदको विरोध गरेको थियो भने विकास विरोधीको सँज्ञा दिँदै नेकपाले परिषदको समर्थन गरेको थियो । सो स्थितिबीच कमला नगरपालिकाले करिब ६२ करोडको बजेट अनुमोदन गरेको हो ।