बर्दिवासमा निषेधाज्ञा (कफ्र्यू) लगाउने प्रशासनको तयारी

न्यूज ब्यूरो, जनकपुरधाम । महोत्तरीको बर्दिवासमा स्थानीय प्रशासनले निषेधाज्ञा (कफ्र्यू) लगाउने तयारी गरिरहेको छ ।

बर्दिवास नगरपालिका वडा नं. १४ की ६ बर्षिय बालिका गुलास साह खातुनको बलात्कारपछि हत्या गरिएको भन्दै स्थानीयहरुले गरेको प्रदर्शनको क्रममा भएको झडपमा परी ३ जना गम्भिर घाईते भएको छ । सो सँगै स्थानीय प्रशासनले मँगलबार जस्तै अवस्था रहे निषेधाज्ञा लगाउने प्रस्तावमाथि निकायहरुको छलफल भइरहेको छ ।

आक्रोसित स्थानीयहरुले बलात्कार तथा हत्याका आरोपित स्थानीय अरुण साहको घरमा आगजनी गरेको थियो भने बालिकाको शव (लास) लाई बीच राजमार्गमा राखेर प्रदर्शन गरेपछि पूर्वपश्चिम राजमार्गबाट चल्ने हजारौं सवारी साधन जकथक परेको थियो ।

बिहानैदेखि स्थानीयहरुले राजमार्ग जाम गरेको थियो भने अपरान्ह करिब ४ बजेतिर मोटो सँख्यामा उत्रेका सुरक्षाकर्मीहरुले राजमार्ग खुलाएका हुन् । स्थानीय प्रदर्शनकारी र प्रहरीबीच सोही क्रममा भएको झडपमा परी ३ जनालाई प्रहरीको गोली लागेर गम्भिर घाईते भएपछि स्थानीयहरु झन आक्रोसित बनेका छन् ।

भीडको उग्रता नियन्त्रण गर्नको लागि घुँडामुनी गोली चलाउन सक्ने प्रावधान भएपनि प्रहरीले एकै जनालाई ४/४ वटा गोली दागेको स्थानीयहरुको आरोप छ । एक जनालाई तीघ्रामा हानेको गोली आरपार भएपछि प्रदर्शनकारीहरु झन आक्रोसित भएको छ ।

सोही अवस्थालाई मध्यनजर गर्दै जिल्ला प्रशासन कार्यालय महोत्तरीका सिडिओले कफ्र्यू लगाउने प्रस्ताव उपर सर्वपक्षिय बैठक जारी रहेको बताएका छन् ।

आइतबार साँझदेखि हराइरहेकी बर्दिबास नगरपालिका १४ शुभम् बस्तीका सहिद आलमाकी ६ वर्षीया छोरी गुलाब साह खातुनको शव सोमबार राति घरनजिकै बोरामा राखेको अवस्थामा फेला परेको थियो।

बालिकाको बालत्कार गरी हत्या गरिएको भन्दै मंगलबार बिहानैदेखि स्थानीयहरु आक्रोशित हुँदै प्रदर्शनमा उत्रेका थिए। बालिका बालत्कार तथा हत्या आरोपमा पक्राउ परेका स्थानीय अरुण साहको घर समेत स्थानीयले जलाएपछि अवस्था तनावग्रस्त बनेको हो ।