दिपावलीको पूर्वसंध्यामा घुर्मी बजारमा सरसफाइ

न्यूज ब्यूरो, सिरहा । हिन्दुहरुको महान चाड दिपावली तथा छठको अवसरमा मिर्चैया नगरपालिका-९ स्थित घुर्मी बजारमा बृहत सरसफाइ कार्यक्रम गरिएको छ ।

निर्धन कृषि सहकारी संस्था लिमिटेडले बिहीवार बिहान घुर्मी बजारमा सरसफाइ गरेको हो । स्थानीय र युवाहरूको सहभागितामा सरसफाइ कार्यक्रम गरिएको सहकारीका अध्यक्ष रामदयाल यादवले जानकारी दिए ।

‘यहाँ जताततै फोहोर थियो, दिपावली र छठ आउँदैछ, सरसफाइसँगै सचेतना फैलाउने काम पनि गरेका छौं,’ उनले भने, ‘सबैलाई सरसफाइमा सहभागिताका लागि आह्वान गरेका थियौं, सबैको सहभागितामा कार्यक्रम भएको छ ।’

उनले आवश्यकताको आधारमा सरसफाइ कार्यक्रमलाई निरन्तरता दिइरहने बताए । यस प्रकारको कार्यक्रमले आफ्नो ठाउँलाई सफा राख्न मद्दत पुग्नुका साथै नागरिकलाई पनि समाजप्रति जिम्मेवार बन्न प्रेरित गर्ने उनको विश्वास छ ।

सामाजिक उत्तरदायित्व सबैको भएकाले पनि यस्ता कार्यमा सबैलाई जुट्न उनले आह्वान पनि गरे ।