विष्णुपुरका वडाध्यक्षको आरोप : 'गाउँपालिकालाई कार्यकर्ता पालन केन्द्र बनाइयो'

न्यूज ब्यूरो, सिरहा । सिरहाको विष्णुपुर गाउँपालिकाका एक वडाध्यक्षले गाउँपालिका अध्यक्षले मनोमानी गरी काम गरिरहेको आरोप लगाएका छन् ।

गाउँपालिकाका वडा १ का अध्यक्ष गोपिन्द्र यादवले बिहीबार पत्रकार सम्मेलन नै आयोजना गरी यस्तो आरोप लगाएका हुन् । गापा अध्यक्ष जागेश्वर यादवले कर्मचारी भर्ना, पोखरी ठेक्का, विकास निर्माणका कामममा समेत मनमाना ढङ्गले कामगर्ने गरेको उनको आरोप छ ।

गाउँपालिकाको वडा १ मा रहेको १६ वटा पोखरीका ठेक्का आफन्त, कार्यकता तथा आर्थिक चलखेलको आधार ठेक्का लगाएको उनले बताए । ‘मेरै वडाका पोखरीहरु म वडा अध्यक्षलाई समेत जानकारी नदिई, कुनै प्रकृया समेत नपुर्याई, गोप्य ढङ्गले आफ्ना नजीकका तथा कार्यकर्ताहरुलाई कौडीको भाउमा पोखरी जिम्मा लगाएको छ ।’

उनलेभने, ‘हडियाबाला पोखरी यस अघि वार्ड नम्बर १ कै भोगेन्द्र प्रसाद यादवले ३ वर्षको लागि ८ लाख ७५ हजार रुपैयाँमा ठेक्का लिएको भएपनि ०७७÷०६÷०७ गते सोही व्यक्तिलाई ५ वर्षको लागि रु ५ लाख, ८५ हजार, ५ सय ५ रुपैयाँमा दिएको छ ।’ त्यसैगरी, गौरीपुरको पुलकित घर नजिकको पोखरी ३ वर्षको लागि ४ लाख भन्दा बढी मूल्यमा ठेक्का लागेपनि, सोही पोखरी अहिले ५ वर्षको लागि पुरानो ठेक्का दरभन्दा कम रेटमा लागेको छ ।

अमानत पोखरी गौरीपुर पनि ३ वर्षको लागि ३ लाख भन्दा बढीमा लागेको थियो अहिले ५ वर्षको लागि २ लाखमा लगाएको छ । हरिनगराको पोखरी १३ लाखमा ३ सालको ठेक्का लागाएकोे थियो, अहिले त्यो पोखरी ६ लाखमा ५ वर्षको लागि ठेक्का लगाएको छ ।

साथै गापाले वडाका मोटो रकमको बजेट समेत वडा कार्यलयलाई बेवास्ता गरी गोप्य तरिकाले गाँपा अध्यक्ष स्वमले चलाउने गरेको र कयसैगरी वार्ड नम्वर १ मा रहेको सवै पोखरीहरु पुरानो ठेक्का दरभन्दा कम मूल्यमा लगाएको छ ।

यसरी सवै पोखरीहरु पुरानो दरभाउ भन्दा कम रेटमा ठेक्का लगाएकोले आर्थिक चलखेल भएको स्पष्ट भएको अध्यक्ष यादवले बताए । उनले भने, ‘हरेको बस्तुको मूल्य बढी रहेको छ, ठेक्काको दर रेटपनि बढ्दै जानुपर्ने हो तर यहाँ सवै कम मूल्यमा लगाएको छ ।’

वडा कार्यालयले आफ्नो क्षेत्रमा रहेको पोखरी कुन प्रकृयाले, कसलाई र कति दरमा ठेक्का लगाएको हो भन्ने विवरण माग गर्दा पनि नदिएको उनले जनाए । अध्यक्ष यादवले पटक पटक सूचना माग गर्दा पनि हाल सम्म सूचना नपाएको बताए ।

सूचनाकै लागि पनि आफू जिल्ला प्रशासन कार्यालयसम्म पुग्नु परेको सुनाए । यतिमात्र नभई गापालाई अध्यक्ष जागेश्वर यादवले कर्मचारी र शिक्षक भर्नाको नाममा कार्यकर्ता भर्ति केन्द्र बनाएको उनको भनाइ छ ।

कुनै सूचना तथा जानकारी विनै कुनै प्रकृया नअपनाई १२ जना शिक्षक र १९ जना कार्यालय सहयोगी र चौकीदार समेत भर्ना गरेको वडाध्यक्ष यादवले जानकारी दिए । तलव सुविधा दिने गरी २ जना पीए र कानुनी सल्लाहकार नियुक्त गरेका छन् ।

कार्यकर्ता व्यवस्थापन गर्ने नाममा जङ्गल नभएको यो पालिकामा २ जना वनपाले नियुक्त गरेका छन् । उनीहरुलाई वन पाले भनेर नियुक्त गरेपनि अन्य कार्यमा लगाएको बताइएको छ ।

सवै भर्ना प्रकृयाको विषयमा कार्यपालिकामा निर्णय पनि गराएको छैन । नियुक्तिको विषयमा जानकारी समेत नदिई आफू जनप्रतिनिधिहरुलाई समेत गुमराहमा राखेको उनले बताए ।

उनले यसको घोर निन्दा गर्दै शिक्षक कर्मचारी भर्ना, पोखरी ठेक्का र विकास निर्माण लगायतका कार्यहरुलाई पनि विधि र प्रकृया अपनाएर कार्य अगाडी बढाउन माग गरेका छन् । यस्तो खालको कार्यले कानूनी राज्यको उपहास् गरेको भन्दै यस्तै अवस्था दोहरी रहे सवै काम ठप्प हुनेगरी कार्यालय घेराउ र तालाबन्दी गर्न बाध्य हुने समेत उनको चेतावनी छ ।