जनकपुरका यी वडाध्यक्ष स्वतः निलम्बनमा !

न्यूज ब्यूरो, जनकपुरधाम । जनकपुरधाम उपमहानगरपालिकाका एक वडाध्यक्ष कानुनी प्रावधान अनुसार स्वतः निलम्बनमा परेका छन् ।

जनकपुरधाम उपमहानगरपालिका वडा नं. १३ का वडाध्यक्ष शुभ नारायण मण्डल स्वतः निलम्बनमा परेका छन् । उनी विरुद्ध विशेष अदालत काठमान्डौंमा भ्रष्टाचार सम्बन्धी मुद्दा दायर भएपछि स्वतः निलम्बनमा परेका हुन् ।

उनको साथै गत असोज १५ गते एक सेवाग्राहीसँग नागरिकताको सिफारिस गरिदिने वापत घुस लिँदालिँदै २४ हजार रुपैयाँ सहित रँगेहात पक्राउ परेका कार्यालय सहयोगी (पियन) दिलिप कुमार पञ्जियार विरुद्ध मुद्दा दायर भएपछि वडाध्यक्ष मण्डल निलम्बनमा परेका छन् ।

कार्यालय सहयोगी पञ्जियारले सेवाग्राहीलाई आफु नै वडा सचिव रहेको र नागरिकताको सिफारीस आफुले नै गर्ने भन्दै उनीसँग घुस रकम लिएका थिए ।

जनकपुरः २४ हजार घुस सहित पियन रँगेहात पक्राउ

अनुसन्धानको क्रममा वडाध्यक्ष मण्डल र कार्यालय सहयोगी पञ्जियारको मिलोमतोमा सेवाग्राहीको नागरिकता बनाउन वडाबाट सिफारिस पत्र दिने प्रयोजनको लागि वडाध्यक्षले भने अनुसार नै पञ्जियारले घुस रकम बार्गेनिङ गरी घुस लिएको तथ्य प्रमाण सहित पुष्टि भएको भन्दै अख्तियार दुरुपयोग अनुसन्धान आयोगले विहिबार विशेष अदालतमा मुद्दा दायर गरेको हो ।

सो कार्य भ्रष्टाचार निवारण ऐन, २०५९ को दफा ३ को उपदफा (१) को कसुर भएकोले दुवैजनालाई जनही २४ हजार बिगो कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को खण्ड (क) बमोजिम सजाय हुन मागदाबी लिई मुुद्दा दायर गरिएको अख्तियार दुरुपयोग अनुसन्धान आयोगका प्रवक्ता तारानाथ अधिकारीले जनाएका छन् ।