जनकपुरः २४ हजार घुस सहित पियन रँगेहात पक्राउ

न्यूज ब्यूरो, जनकपुरधाम । जनकपुरबाट एक वडा कार्यालयको पियन (पिउन) लाई अख्तियारले २४ हजार रुपैयाँ घुस सहित पक्राउ गरेको छ ।

जनकपुरधाम उपमहानगरपालिका वडा नम्बर १३ का कार्यालयका कार्यालय सहयोगीलाई विहिबार दिउँसो पक्राउ गरिएको हो । पक्राउ पर्नेमा पिउन दिलीप पँजियार रहेको अख्तियार दुरुपयोग अनुसन्धान आयोग बर्दिवासले जनाएको छ ।

सेवाग्राहीसँग नागरिकताको सिफारिस गरिदिने भन्दै २४ हजार रुपैयाँ घुस लिँदालिदै उनलाई पक्राउ गरिएको हो । सेवाग्राहीलाई आफू सचिव रहेको भन्दै कार्य अगाडी बढाउनको लागि सेवाग्राहीसँग २४ हजार रुपैयाँ घुस मागेका थिए ।

उनलाई कार्यालय परिसरबाटै गोप्य सूचनाको आधारमा पक्राउ गरिएको हो। पक्राउ परेका पञ्जियारमाथि थप अनुसन्धान भइरहेको जनाइएको छ।