अब हिलोमा हिडने अवस्था रहनेछैन : मेयर मण्डल

न्यूज ब्यूरो, जनकपुरधाम । धनुषाको हँसपुर नगरपालिकाका मेयर राम ज्ञान मण्डलले नगरवासीलाई अब हिलोमा हिडने अवस्था निकट भविष्यमै समाप्त हुने बताएका छन् ।

बुधबार हँसपुर नगरपालिका वडा नं. ८ मा पिसिसि ढलानको उदघाटन गर्दै मेयर मण्डलले नगरपालिका आन्तरिक किचलोका कारण केही तहसम्म कमजोर भएको अवस्थालाई चिर्दै अब विकास निर्माणमा लहर आउने दाबी गरे ।

उनले सबै जनप्रतिनीधि, राष्ट्रसेवक कर्मचारी र आम नागरिकबीचको सम्बन्ध सहित आन्तरिक किचलो पनि समाप्त भएको भन्दै नगरपालिकाको विभिन्न वडामा विकास निर्माणलाई पालिकावासीले अनूभूति गर्ने बताए ।

वडा नं. ८ झटियाही टोलमा २ सय ७५ मिटरको पिसिसि ढलानको उदघाटन गर्दै मेयर मण्डलले राजनीतिक कारणले धकेलिएको विकास निर्माणको कार्यलाई प्राथमिकता दिएर सोही गतिमा विकास निर्माण हुने बताए ।

झटियाहीमा स्थानीय राजे दर्जीको घरदेखि दुर्गा मन्दिरसम्म ३० लाख रुपैयाँको लागतमा २ सय ७५ मिटरको पिसिसि ढलान कार्य बुधबारदेखि सुरु गरिएको छ । सो सडकमा बर्षायाममा हिलाम्य भइरहेको अवस्थामा स्थानीय जनप्रतिनीधिहरुको सक्रियतामा पिसिसि ढलान कार्य सुरु गरिएको हो ।

सो क्रममा वडा नं. ८ का वडाध्यक्ष जीवछ मण्डलको विशेष उपस्थिति सहित स्थानीयहरुको सहभागीता रहेको थियो ।