धनुषाको पर्साहीमा कविर आश्रमको धर्मशाला बन्दै

न्यूज ब्यूरो, जनकपुरधाम । धनुषाको हँसपुर नगरपालिकामा सँत कविर आश्रमको लागि धर्मशाला निर्माण गरिने भएको छ ।

एक कार्यक्रमको आयोजना गरी शनिबार नगरपालिकाका मेयर राम ज्ञान मण्डलले भूमि पूजन गरी धर्मशालाको शिलान्यास गरेका हुन् । हँसपुर नगरपालिका वडा नं. ७ पर्साहीमा सँत कविर आश्रमको लागि धर्मशाला निर्माण गरिन लागेको मेयर मण्डलले बताए ।

आश्रमका सँत जुगेश्वर दासको अध्यक्षता एवम् मेयर मण्डलको प्रमुख आतिथ्यमा सम्पन्न भएको भूमि पूजनको क्रममा सो धर्मशालाको लागि ६० लाख रुपैयाँ बजेट विनियोजन गरिएको बताईएको छ । स्थानीयहरुको विशेष आग्रहमा सँतहरुको वासस्थान सहित बाहिरबाट भजन किर्तनको लागि आउने कविर साधुहरुको लागि सो धर्मशाला निर्माण गर्न लागिएको बताइएको छ ।

नगरकी उप प्रमुख रेणु झा एवम् वडा नं. ७ का वडाध्यक्ष राम सरोज मण्डलको विशेष उपस्थितिमा स्थानीयहरुको विशेष रोहबरमा भूमि पूजन गरिएको हो । शुक्रबार मात्र हँसपुर नगरपालिकाको वडा नं. ८ मा सँत कविर आश्रम भवनको मेयर मण्डलले शिलान्यास गरेका थिए ।