मिर्चैया नगरपालिकाविरुद्ध दोश्रो चरणको आन्दोलन घोषणा

न्यूज ब्यूरो, सिरहा । मिर्चैया नगरपालिकाविरुद्ध दोश्रो चरणको आन्दोलन घोषणा गरिएको छ ।

नगरपालिकाविरुद्ध गठित विभिन्न दल सम्मिलित सर्वदलीय संयुक्त संघर्ष समितिले दोश्रो चरणको आन्दोलन घोषणा गरेको हो ।

यसअघि विभिन्न माग राखी आन्दोलन गरिएपनि नगरपालिकाबाट कुनै किसिमको प्रतिक्रिया नआएको तथा बेवास्ता गरिएको भन्दै दोश्रो चरणको आन्दोलन घोषणा गरेको संघर्ष समितिले जनाएको छ ।

नगरमा भइरहेको व्यापक भ्रष्टाचार, अनियमितता तथा अपारदर्शीताको विरुद्धमा यसअघि मिर्चैयामा प्रदर्शन तथा वडा ३ मा सार्वजनिक सुनुवाइ कार्यक्रम गरिएको थियो । यस आन्दोलनको बेवास्ता भएपछि संघर्ष समितिको असोज २ को बैठकले दोश्रो चरणको आन्दोलनको कार्यक्रम सार्वजनिक गरेको छ ।

आन्दोलनका कार्यक्रम अन्तर्गत समितिले संयुक्त रुपमा असोज ५ गते नगरपालिकाका प्रमुख प्रशासकीय अधिकृतलाई भेटि दवाव दिनेछन् भने असोज ७ गते मोहन उमाविमा पछिल्लो ५–७ वर्षयता व्यापक भ्रष्टाचार भइ आइरहेको भन्ने सन्दर्भमा विद्यालयका प्रअसँग छलफल गर्ने कार्यक्रम छ । यस्तै, असोज ९ गते लथालिङ अवस्थामा रहेको मिर्चैया खानेपानीको समस्या समाधान गराउन खानेपानीको कार्यलयमा गइ दवाव दिने समितिले जारी गरेको विज्ञपप्तिमा उल्लेख गरिएको छ ।

समितिले असोज ११ गते समिक्षा बैठक बस्ने र सोही बैठकमै तेश्रो चरणको आन्दोलनको कार्यक्रम तय गरी सार्वजनिक गर्ने जनाएको छ ।