प्रहरी हिरासतमा ज्यान गुमाएका विजयको परिवारलाई कांग्रेस सभापतिको सहयोग

न्यूज ब्यूरो, रौतहट । प्रहरी हिरासतमा मृत्यु भएको दलित युवा विजय महराको परिवारलाई नेपाली कांग्रेस रौतहटका सभापति तथा पूर्व सांसद कृष्ण यादवले एक लाख रुपैयाँ सहयोग गरेका छन् ।

पीडित परिवारलाई राहत महसुस गराउन आफुले सहयोग गरेको बताउदै सभापति यादवले थप राहतसहित न्याय दिन केन्द्र सरकारसंग माग गरेका छन् ।

गत साउन ३२ गते गरुडा नगरपालिका–८ जिगडियाका १७ वर्षीय निरन्जन रामको घाँटी रेटी हत्या भएपछि प्रहरीले घटनामा संलग्न सात जनालाई पक्राउ गरेको थियो ।

तीनैमध्येका एक विजय महरा (चमार) लाई प्रहरीले निरन्तर यातना दिदाँ अस्वस्थ भई अस्पतालमा उपचारको क्रममा मृत्यु भएको थियो । उनै विजय महराको घरमा पुगेर पीडित परिवारलाई सहयोग रकम हस्तान्तरण गर्दै सभापति यादवले घटनामा संलग्न प्रहरीलाई हदैसम्मको कारवाही गर्न ध्यानाकर्षण गराए ।

दोषीलाई कारवाही नगरे रौतहट कांग्रेसले चरणबद्ध रुपमा जिल्लामा आन्दोलन चर्काउने सभापति यादवले बताए ।