अन्तराष्ट्रिय युवा दिवस : आरम्भको वृक्षारोपनमा राज्यमन्त्री मण्डलको भर्चुअल सम्बोधन

न्यूज ब्यूरो, सिरहा । सिरहाको गोलबजारमा आरम्भ साइन्स एण्ड कल्चर क्लबले वृक्षा रोपन कार्यक्रम गरेर अन्तराष्ट्रिय युवा दिवस मनाएको छ ।

अन्तराष्ट्रिय युवा दिवसको अवसरमा क्लबले गोलबजार नगरपालिका–२ स्थित गुरुधाममा वृक्षा रोपन गरेको हो ।

‘हाम्रो गाउँ बनाउने जिम्मेवारी हाम्रै हो’ भन्ने मूल नाराका साथ गाउँको विभिन्न भागमा विभिन्न जातका विरुवा रोपिएको क्लबका अध्यक्ष रामकुमार यादवले जनाए । ‘पहिलादेखि अलिक भव्य कार्यक्रम नै गर्ने योजना थियो,’ उनले भने, ‘तर कोरोना कहरका कारण त्यो सम्भव भएन, गाउँमै मनायौं ।’

कार्यक्रममा प्रमुख अतिथिका रुपमा प्रदेश २ का उद्योग, पर्यटन, वन तथा वातावरण राज्यमन्त्री सुरेश कुमार मण्डललाई निम्त्याइएको थियो । कोभिड–१९ को जोखिमका कारण उनी भर्चुअप विधिबाटै कार्यक्रममा सरिक भए ।

भिडियो लाइभबाट कार्यक्रमलाई सम्बोधन गर्दै राज्यमन्त्री मण्डलले क्लबले सामाजिक रुपान्तरणको लागि विभिन्न समयमा गर्दै आएको कार्यको प्रशंसा गरे । उनले युवाको सहभागिता बिना रुपान्तरण असम्भव रहेको भन्दै युवाहरु अगाडि आउनुपर्ने बताए ।

सामाजिक रुपान्तरणका लागि अग्रसर भइरहेका युवाहरुलाई चाहिने हरेक प्रकारको सहयोग गर्न प्रदेश सरकार र आफू गर्न तयार रहने प्रतिवद्धता उनले जनाए ।