मिर्चैया नगरपालिकाको सबै वडामा अब अनलाइन बिलिङ

न्यूज ब्यूरो, सिरहा । मिर्चैया नगरपालिकाले सबै वडामा अनलाइन प्रणालीबाट कर संकलन तथा बिलिङ सेवा प्रारम्भ गरेको छ ।

नगरपालिकाले चालु आर्थिक वर्षबाट सेवा प्रवाह चुस्त दुरुस्त बनाउने निर्णयसँगै अनलाइनको माध्यमबाट कर संकलन तथा बिलिङ सेवा प्रवाह सुचारु गरिएको हो । यससँगै कर संकलन तथा बिलिङ कार्य अब नगरपालिकाको प्रत्यक्ष निगरानीमा रहनेछ ।

मिर्चैया नगरपालिकामा जम्मा १२ वटा वडा छन् । अनलाइन प्रणाली सुचारु भएसँगै सेवा प्रवाहमा पनि अब सहजता हुने नगरपालिकाका राजश्व शाखा प्रमुख जित साहले जानकारी दिए ।

यता, नगरपालिकाका नगरप्रमुख श्रवण कुमार यादवले नगर र सबै वडाको हरेक सेवालाई क्रमशः डिजिटलाइज गरिँदै जाने जानकारी दिएका छन् ।